سوئیڈن میں قرآن کی بے حرمتی گھناؤنا عمل:میتھیو ملر

واشنگٹن: امریکی محکمہ خارجہ کے ترجمان میتھیو ملر نے کہا ہے کہ کسی بھی مذہبی کتاب کی بے حرمتی کرنا گھناؤنا عمل ہے، ہم ان جیسی حرکتوں کی مذمت کرتے ہیں۔ میتھیو ملر نے کہا کہ ہم قرآن پاک اور دیگر عبادات کی اہمیت کو سراہتے ہیں۔

انہوں نے کہا کہ ہم ہر ایک کے لیے مذہب یا عقیدے کی آزادی کے حق کی حمایت کرتے ہیں، پرامن اجتماع کے حق اور اظہار رائے کی آزادی کی بھی حمایت کرتے ہیں، ہم لوگوں لوگوں کی آزادی اظہار کے حق کو استعمال کرنے کو تسلیم کرتے ہیں۔

دوسری جانب میتھیو ملر سے صحافی نے سوال کیا کہ امریکا پاکستان میں انتخابات کی شفافیت سے متعلق کیا کہتا ہے؟

ترجمان امریکی محکمہ خارجہ نے کہا کہ واضح کرتے ہیں کہ پاکستان میں بنیادی جمہوری اصولوں کو سپورٹ کرتے ہیں، یہ اصول آزاد میڈیا، آزادی اظہار رائے، اجتماع کی آزادی ہیں اور یہی تمام اصول جمہوری انتخابات کی بنیاد ہیں جن کی حمایت کرتے ہیں۔

انہوں نے کہا کہ ہم ناصرف پاکستان بلکہ پوری دنیا میں قانون کی حکمرانی کے حامی ہیں۔ طالبان سے متعلق میتھیو ملر نے کہا کہ میں طالبان پر کسی قسم کے اعتماد یا اعتماد کی کمی کا اظہار نہیں کرتا، ہم طالبان کو ان کے وعدوں پر قائم رکھنے پر بات کرتے رہیں گے۔

میتھیو ملر نے مزید کہا کہ خطے میں انسداد دہشت گردی کارروائیاں کرنے کی صلاحیت برقرار رکھیں گے، طالبان کے وعدوں سے قطع نظر، امریکی مفادات کے تحفظ کا حق برقرار رکھیں گے۔