گھریلو ایل پی جی سلنڈر 60 روپے اور کمرشیل سلنڈر 114.50 روپے مہنگا

نئی دہلی: بین الاقوامی بازار میں خام تیل اور گیس کی قیمتوں میں اضافہ اور ڈالر کے مقابلے روپے کی مسلسل گراوٹ کے باعث تیل مارکیٹنگ کمپنیوں نے ہفتہ سے گھریلو گیس (ایل پی جی) کی قیمتوں میں اضافہ کر دیا ہے۔

ملک کی سب سے بڑی تیل مارکیٹنگ کمپنی انڈین آئل کارپوریشن کی ویب سائٹ کے مطابق 14.2 کلوگرام کے گھریلو ایل پی جی سلنڈر کی قیمت میں آج سے 60 روپے کا اضافہ کیا گیا ہے، جبکہ 19 کلوگرام کے کمرشیل گیس سلنڈر کی قیمت 114.50 روپے بڑھ گئی ہے۔

نئی دہلی میں 7 مارچ سے گھریلو ایل پی جی سلنڈر کی نئی قیمت 913 روپے ہو گئی ہے، جو جولائی 2023 کے بعد سب سے زیادہ سطح ہے۔ کولکاتا میں اس کی قیمت 939 روپے، ممبئی میں 912.50 روپے اور چنئی میں 928.50 روپے ہو گئی ہے۔

گھریلو ایل پی جی سلنڈر کی قیمت میں تقریباً 11 ماہ بعد تبدیلی کی گئی ہے۔ اس سے پہلے 8 اپریل 2025 کو اس کی قیمت میں 50 روپے کا اضافہ کر کے اسے 853 روپے فی سلنڈر کر دیا گیا تھا۔

دوسری طرف کمرشیل گیس سلنڈر کی قیمت دہلی میں 1,768.50 روپے سے بڑھ کر اب 1,883 روپے ہو گئی ہے، جو اپریل 2023 کے بعد سب سے زیادہ ہے۔

کمرشیل ایل پی جی سلنڈر کی قیمت میں لگاتار چوتھی بار اضافہ کیا گیا ہے۔ اس سے قبل یکم مارچ کو بھی دہلی میں اس کی قیمت میں 28 روپے کا اضافہ کیا گیا تھا۔

کولکاتا میں آج سے 19 کلوگرام کا ایل پی جی سلنڈر 1,990 روپے، ممبئی میں 1,835 روپے اور چنئی میں 2,043.50 روپے کا ہو گیا ہے۔

چاروں بڑے شہروں میں ایل پی جی کی قیمتوں میں یکساں اضافہ کیا گیا ہے۔

قابلِ ذکر ہے کہ مغربی ایشیا میں جاری بحران کے باعث خام تیل اور گیس کی پیداوار اور عالمی سپلائی چین متاثر ہوئی ہے، جس کے نتیجے میں ان کی قیمتوں میں نمایاں اضافہ ہوا ہے۔

اس کے ساتھ ہی ہندستانی روپیہ بھی تاریخی نچلی سطح پر ہے، جس کی وجہ سے قیمتوں میں یہ اضافہ کیا گیا ہے۔