کریم نگر میں پینے کے پانی کا بحران، عوام ٹینکروں پر انحصار کرنے پر مجبور

کریم نگر: تلنگانہ کے شہر کریم نگر میں پینے کے پانی کی قلت کے باعث عوام کو شدید مشکلات کا سامنا ہے۔ شہر کے مختلف علاقوں میں پانی کے ٹینکر نظر آرہے ہیں، جبکہ مقامی افراد پینے کا پانی حاصل کرنے کے لیے گھڑوں اور ڈرموں کے ساتھ انتظار کرنے پر مجبور ہیں۔

اطلاعات کے مطابق کئی علاقوں میں پانی کی باقاعدہ سربراہی متاثر ہونے کے باعث عوام اپنی روزمرہ ضروریات پوری کرنے کے لیے ٹینکروں پر انحصار کررہے ہیں۔

پانی کی قلت نے مقامی خاندانوں کی پریشانیوں میں اضافہ کردیا ہے۔ عوام کو پینے کا پانی حاصل کرنے کے لیے کافی وقت صرف کرنا پڑ رہا ہے۔

مقامی افراد نے متعلقہ حکام سے مطالبہ کیا ہے کہ پانی کی قلت کا فوری ازالہ کرتے ہوئے شہر کے تمام علاقوں میں پینے کے پانی کی بلا تعطل سربراہی کو یقینی بنایا جائے۔