درگم چیروو کے قریب سیلابی پانی میں بہہ جانے والے فوڈ ڈیلیوری ملازم کو ہائیڈرا نے بچالیا

حیدرآباد: شہر کے مادھاپور میں درگم چیروو کے قریب جمعہ کی رات سیلابی پانی میں بہہ جانے والے 45 سالہ فوڈ ڈیلیوری ملازم کو ہائیڈرا کی ڈیزاسٹر ریسپانس فورس (DRF) اور مانسون ریسکیو ٹیم (MRT) نے بڑی جدوجہد کے بعد بحفاظت بچالیا۔

بچائے گئے شخص کی شناخت ارجن کشور کے طور پر کی گئی ہے، جو الیکٹرک موپیڈ پر سوار تھا۔ وٹھل راؤ نگر کے قریب تیز رفتار سیلابی پانی اسے گاڑی سمیت بہا کر ایک نالے میں لے گیا۔

اطلاعات کے مطابق وہ حالیہ اسٹریٹجک نالہ ڈیولپمنٹ پروگرام (SNDP) کے تحت تعمیر کی گئی زیرِ زمین پائپ لائن میں تقریباً 50 میٹر تک بہتا چلا گیا۔

واقعہ کی اطلاع ملتے ہی ہائیڈرا کی DRF اور MRT ٹیمیں فوری طور پر موقع پر پہنچیں اور ٹارچوں کی مدد سے زیرِ زمین پائپ لائن میں تلاشی مہم شروع کی۔ کافی جدوجہد کے بعد ریسکیو اہلکاروں نے ارجن کشور کا پتہ لگایا اور اسے بحفاظت باہر نکال لیا۔

زندگی اور موت کی کشمکش سے بچنے والے ارجن کشور نے راحت کا اظہار کرتے ہوئے ہائیڈرا کا شکریہ ادا کیا اور کہا کہ ادارے نے ان کی جان بچائی۔

ہائیڈرا کمشنر اے وی رنگناتھ بھی جائے وقوعہ پر پہنچے، واقعہ کی تفصیلات حاصل کیں اور ارجن کشور سے ملاقات کرکے اس کی خیریت دریافت کی۔ انہوں نے اس سے یہ بھی پوچھا کہ وہ اس خطرناک صورتحال سے کس طرح بچ نکلنے میں کامیاب ہوا۔

DRF اور MRT ٹیموں کی بروقت کارروائی سے ایک بڑا سانحہ ٹل گیا۔