حیدرآباد میں فامس کی وصولی کیلئے 600 کاونٹرس کا قیام، ہر کاونٹر پر اردو میں بھی فامس دستیاب

حیدرآباد: کمشنرجی ایچ ایم سی رونالڈروزنے کہاہے کہ 28 دسمبرسے شروع ہونے والے پرجاپالانا پروگرام کیلئے جی ایچ ایم سی عہدیدار متحرک ہوچکے ہیں۔

28دسمبر تا 6 جنوری تک جاری رہنے والے اس پروگرام کے انعقاد کیلئے بڑے پیمانہ پر انتظامات مکمل کرلئے گئے اور جی ایچ ایم سی کی مشنری متحرک ہوچکی ہے۔ ہرایک بلدی وارڈ میں اس پروگرام کیلئے 4کاونٹرس قائم کئے گئے جبکہ جی ایچ ایم سی کے 150 وارڈس میں 600کاونٹرس قائم کئے گئے ہیں۔ اس پروگرام کیلئے تلگواور اردومیں بھی درخواستیں‘ کاونٹرس پر دستیاب رہیں گی۔

درخواست گزارفام کی تکمیل کے بعدفوری متعلقہ کاونٹرس پر ہی داخل کریں۔ کمشنر نے عوام کومطلع کیاہے کہ مذکورہ فامس حکومت کی اعلان کردہ 5 اسکیمات کیلئے خانہ پری کے بعدد اخل کریں۔ فارمس کی تکمیل کیلئے عوام پریشان نہ ہوں۔متعلقہ کاونٹرس پر والینٹرس فام کی تکمیل کیلئے دستیاب رہیں گے۔

سارے شہر میں تقریباً 10 ہزار اسٹاف اوروالینٹرس اس پروگرام میں شامل رہیں گے جولوگ فامس کی تکمیل نہیں کرسکتے والینٹرس ان کی مدد کریں گے۔

پرجاپالانا پروگرام کی کامیابی کیلئے ہر سرکل پرایک اسپیشل آفیسر کا تقرر کیا گیا ہے جومتعلقہ سرکل کے زونل کمشنر کے ساتھ تعاون کریں گے۔

درخواست گزارکو چاہئے کہ وہ اپنا نام‘پتہ‘ فون نمبر درج کریں‘ کمشنر رونالڈروز نے فیلڈ آفیسرس کو ہدایت دی ہے کہ وہ متعلقہ کاونٹرس پر عوام کی سہولت کیلئے پینے کا پانی‘شامیانہ‘ کرسیاں اور دیگر سہولتیں فراہم کریں۔

بتایاگیا ہے کہ یہ خصوصی کاونٹرس 28 دسمبر سے 6 جنوری تک کام کریں گے۔سوائے 31 دسمبر اور یکم جنوری 2024 کو عوامی تعطیل کے روز کا م نہیں کریں گے۔