تلنگانہ میں مزید 8 میڈیکل کالجس کا قیام

حیدرآباد: تلنگانہ کے وزیر صحت ہریش راؤ نے کہا کہ ریاست تلنگانہ کی تشکیل کے بعد چھوٹے منڈلوں میں بھی جدید ترین طبی خدمات دستیاب کروائی گئی ہیں۔

ہریش راؤ نے وزیر جگدیش ریڈی کے ساتھ مل کر منوگوڑو حلقہ کے چوٹ اُپل علاقہ میں ڈائلیسس سنٹر کا افتتاح کیا۔ہریش راؤ نے کہا کہ ڈائلیسس سنٹرس گردے کے مریضوں کے لیے خدا کا تحفہ ہیں۔

حکومت تلنگانہ کی تقلید کرتے ہوئے تمل ناڈو کے وزیراعلی اسٹالن بھی وہاں ڈائیلاسز سنٹر قائم کر رہے ہیں۔ انہوں نے کہا کہ تلنگانہ واحد ریاست ہے جو گردے کے مریضوں کو بس پاس اور پنشن فراہم کرتی ہے۔

تلنگانہ کی تشکیل سے پہلے یہاں صرف تین ڈائلیسس سنٹر تھے جن کی تعداد میں اضافہ کرتے ہوئے ان کو 102کردیاگیا۔ آنے والے دنوں میں اس حلقہ میں 100 بستروں کا اسپتال کھولا جائے گا۔

انہوں نے الزام لگایا کہ مرکزی حکومت نے ریاست تلنگانہ کو ایک بھی میڈیکل کالج نہیں دیا ہے۔ انہوں نے کہا کہ تلنگانہ میں ایک سال میں 8 میڈیکل کالجس قائم کئے گئے اور آئندہ سال مزید 8 کالجس قائم کئے جائیں گے۔

انہوں نے یہ بھی الزام لگایا کہ مرکزی حکومت نے بی بی نگر ایمس اسپتال میں ایم بی بی ایس کے طلباء کو سہولیات فراہم کرنے میں ناکام رہی ہے۔