حیدرآباد میں سفاری کڈ پری اسکول کی توسیع: اسدالدین اویسی نے بنجارہ ہلز میں دوسرے سینٹر کا افتتاح کیا

حیدرآباد: عالمی سطح پر معروف پری اسکول برانڈ سفاری کڈ نے حیدرآباد میں بنجارہ ہلز کے علاقے میں اپنے دوسرے مرکز کا آغاز کیا ہے۔

یہ توسیع ہندوستان میں معیاری ابتدائی بچپن کی تعلیم فراہم کرنے کے مشن کی ایک اہم پیشرفت ہے۔ سفاری کڈ کا قیام 2005 میں سلیکون ویلی میں ہوا اور آج یہ امریکہ، کینیڈا اور ہندوستان میں 50 سے زائد مراکز کے ساتھ بین الاقوامی سطح پر نمایاں ادارہ بن چکا ہے۔

حیدرآباد کے رکن پارلیمنٹ اسدالدین اویسی نے بنجارہ ہلز میں سفاری کڈز کے اس نئے مرکز کے آغاز میں شرکت کی اور معیاری ابتدائی تعلیم کی اہمیت پر زور دیا۔ انہوں نے اس بات پر روشنی ڈالی کہ ایسے ادارے نوجوان نسل کی تعلیم و تربیت میں اہم کردار ادا کرتے ہیں۔

سفاری کڈ انڈیا کے چیئرمین جتیندر کرسن نے افتتاحی تقریب میں کہا کہ "حیدرآباد میں ہماری موجودگی کو مزید مضبوط کرنے پر ہمیں خوشی ہے۔” انہوں نے مزید کہا کہ بنجارہ ہلز میں یہ نیا سینٹر سفاری کڈ کی ہندوستان میں بڑھتی ہوئی مانگ کو پورا کرنے کے لیے ایک اہم اقدام ہے۔

اس موقع پر کئی معروف شخصیات، بشمول انعم مرزا، حنا رحمان بیگ، اور نوشابہ فاروقی کے ساتھ ساتھ ایرانی قونصلیٹ جنرل محسن موغادمی بھی موجود تھے۔

سفاری کڈ کا منفرد تعلیمی نظام بچوں کی تخلیقی صلاحیتوں، جذباتی ذہانت، اور تنقیدی سوچ کو فروغ دینے پر مرکوز ہے، جو انہیں مستقبل کے لیے تیار سیکھنے والے بناتا ہے۔

سفاری کڈ 2024 کے تعلیمی سال کے دوران مزید 8 نئے مراکز کھولنے کا ارادہ رکھتا ہے تاکہ ہندوستان بھر میں ابتدائی بچپن کی تعلیم کی بڑھتی ہوئی مانگ کو پورا کیا جا سکے۔