تلنگانہ رائزنگ سمٹ میں دنیا بھر کے ماہرین کی شرکت، چیرنجیوی، ٹونی بلئیر، آنند مہندرا و دیگر کا وزیر اعلیٰ کے ترقیاتی وژن پر اعتماد

تلنگانہ رائزنگ گلوبل سمٹ 2025 میں دنیا بھر کے رہنماؤں، ماہرینِ معاشیات اور صنعت کے بڑے ناموں نے ریاست کی شاندار ترقی اور ’’ویژن 2047‘‘ کی تعریف کرتے ہوئے اہم خطابات کیے۔ وزیر اعلیٰ ریونت ریڈی کی قیادت میں پیش کیے گئے مستقبل کے روڈ میپ کو عالمی سطح پر ایک جدید، عوام دوست اور عملی منصوبہ قرار دیا گیا۔

سابق برطانوی وزیر اعظم ٹونی بلیئر، ممتاز ماہرِ معاشیات ارفند سبرامنیم، امریکی ماہر پروفیسر کارتک مرلی دھرن، فلمی لیجنڈ چیرنجیوی، صنعتکار آنند مہندرا اور سابق گورنر آر بی آئی دوووری سُبّا راؤ سمیت کئی معزز شخصیات نے اپنے تاثرات کا اظہار کیا۔

ٹونی بلیئر نے اپنے خطاب میں کہا کہ 2014 میں ریاست کی تشکیل سے لے کر آج تک تلنگانہ نے حیرت انگیز ترقی کی ہے۔ انہوں نے کہا کہ یہ ریاست ٹیکنالوجی، زراعت اور جامع ترقی کے شعبوں میں ایک ماڈل بن چکی ہے اور دنیا کے مختلف حصوں کے لیے مثال ہے۔

چیرنجیوی نے نوجوانوں کے لیے اسکل ڈویلپمنٹ کے سرکاری اقدامات کو بے حد سراہا۔ انہوں نے کہا کہ اگر نوجوانوں کو صحیح تربیت دی جائے تو وہ کمالات دکھا سکتے ہیں۔ انہوں نے اس بات کا بھی اعلان کیا کہ فلم انڈسٹری وزیر اعلیٰ ریونت ریڈی کے وژن کی مکمل حمایت کرتی ہے۔

سابق چیف اکنامک ایڈوائزر ارفند سبرامنیم نے کہا کہ تلنگانہ اب صرف بھارت کے نقشے پر نہیں بلکہ عالمی سطح پر ٹیکنالوجی کے مرکز کے طور پر ابھر رہا ہے۔ انہوں نے ویژن ڈاکیومنٹ کو ریاست کی ترقی کے اگلے مرحلے کی بنیاد قرار دیا جس میں آئی ٹی پر مبنی معیشت سے آگے بڑھ کر عوام دوست ٹیکنالوجیکل ماڈل پیش کیا گیا ہے۔

پروفیسر کارتک مرلی دھرن نے کہا کہ ویژن 2047 میں رکھے گئے اہداف نہ صرف تلنگانہ بلکہ پورے بھارت کی ترقی میں اہم کردار ادا کریں گے۔ انہوں نے کہا کہ اچھی حکمرانی کے معاملے میں تلنگانہ کی مثال ملک بھر میں قابلِ تقلید ہے اور ان کی ٹیم اس ویژن کے نفاذ میں تعاون کرے گی۔

تلنگانہ کے نائب وزیر اعلیٰ بھٹی وکرمارکا نے کہا کہ ویژن 2047 ریاست کے ہر شہری کا ہے۔ انہوں نے تمام ماہرین کا شکریہ ادا کیا جنہوں نے اس دستاویز کی تیاری میں اپنا علم اور تجربہ شامل کیا۔ ان کا کہنا تھا کہ حکومت اس بات کی پابند ہے کہ یہ وژن وقت کے ساتھ تبدیل ہوتا رہے اور اس کے تمام اہداف پورے کیے جائیں۔

سابق گورنر آر بی آئی سُبّا راؤ نے ریاست کی معاشی ترقی کی تعریف کرتے ہوئے کہا کہ تلنگانہ بھارت کی تیز ترین ترقی کرنے والی ریاست بن چکی ہے۔ انہوں نے کہا کہ حیدرآباد فارما، بائیو ٹیک اور سروس سیکٹر کا مضبوط مرکز ہے اور یہاں کی تربیت یافتہ نوجوان قوت تلنگانہ کو ناقابلِ شکست بنا رہی ہے۔

مہندرا گروپ کے چیئرمین آنند مہندرا نے ویژن ڈاکیومنٹ کو دنیا کی بہترین عوام دوست اور مستقبل پر مبنی پالیسیوں میں سے ایک قرار دیا۔ انہوں نے کہا کہ اس سمٹ نے صنعتوں کے لیے نئے مواقع کے دروازے کھولے ہیں اور یہ وژن نہ صرف بھارت بلکہ عالمی سطح پر متاثر کن ہے۔

تلنگانہ رائزنگ گلوبل سمٹ نے ثابت کر دیا کہ ریاست کی ترقی، حکمرانی اور مستقبل کے منصوبوں کو عالمی تسلیم حاصل ہو رہا ہے۔ ویژن 2047 ریاست کو نئی بلندیوں کی طرف لے جانے والا جامع خاکہ ہے جو آنے والی نسلوں کے لیے ترقی، اختراع اور خوشحالی کی ضمانت پیش کرتا ہے۔

منصف نیوز 24×7 اس سمٹ کی مزید اپ ڈیٹس قارئین تک پہنچاتا رہے گا۔