مہدی پٹنم میں جعلی کرنسی کی گینگ بے نقاب، 8 افراد گرفتار

حیدرآباد: مہدی پٹنم پولیس اور کمشنر ٹاسک فورس ساوتھ ویسٹ زون کی مشترکہ کارروائی میں جعلی کرنسی تیار کرنے والے ایک بڑے گینگ کا پردہ فاش کرتے ہوئے آٹھ ملزمین کو حراست میں لے لیا گیا۔ عیدگاہ گراؤنڈز اور فرسٹ لانسر کے علاقوں میں انجام دی گئی اس کارروائی کے دوران پولیس نے چار لاکھ پچھتّر ہزار روپے مالیت کی جعلی نوٹیں، چار موٹر سائیکلیں، ایک کار اور نو موبائل فون ضبط کر لیے۔

تحقیقات کے دوران انکشاف ہوا کہ مرکزی ملزم کستوری رمیش بابو تانڈور میں اپنی بہن کے ساتھ مل کر اسکینر، لیپ ٹاپ اور فوٹوشاپ سافٹ ویئر کی مدد سے جعلی نوٹ تیار کرتا تھا۔ پولیس کے مطابق یہ گینگ اصلی اور جعلی نوٹوں کو ایک کے مقابلے میں چار کے تناسب سے مارکیٹ میں چلاتا تھا۔

رمیش انسٹاگرام کے ذریعے خریداروں سے رابطہ کر کے جعلی نوٹ فروخت کرتا تھا، جب کہ وحید، طحہ، سہیل، فہد، عمران، عمر اور التمش جیسے افراد ایک منظم چین سسٹم کے تحت ان نوٹوں کو پھیلا رہے تھے۔

اس آپریشن کی نگرانی ڈی سی پی ساوتھ ویسٹ زون جی چندر موہن نے کی، جبکہ کارروائی میں اے سی پی بی کشور کمار، اسسٹنٹ کمشنر اقبال صدیقی، انسپکٹرز جی سنتوش کمار، ملیش، این رام بابو اور سب انسپکٹر پریتی ریڈی نے حصہ لیا۔ تمام گرفتار ملزمین کو عدالتی تحویل میں دے دیا گیا۔