گیان واپی مسجد میں وضو کیلئے پلاسٹک ٹبس فراہم کئے جائیں: سپریم کورٹ

نئی دہلی: سپریم کورٹ نے جمعہ کے دن ضلع کلکٹر وارانسی سے کہا کہ گیان واپی مسجد کامپلکس میں وضو کے لئے پانی سے بھرے پلاسٹک ٹبس کافی تعداد میں دستیاب کرائے جائیں۔

چیف جسٹس ڈی وائی چندرچوڑ اور جسٹس پی ایس نرسمہا پر مشتمل بنچ نے سالیسیٹر جنرل تشار مہتا کا جو حکومت ِ اترپردیش کی طرف سے پیش ہوئے‘ بیان ریکارڈ کیا کہ کلکٹر‘ پانی کی دستیابی یقینی بنائے گا۔

سپریم کورٹ نے قبل ازیں کلکٹر کو ہدایت دی تھی کہ مسجد کامپلکس میں وضو کے کام چلاؤ انتظامات کے لئے میٹنگ طلب کرے۔

عدالت‘ انجمن انتظامیہ مساجد کی درخواست کی سماعت کررہی تھی جس نے ماہ رمضان کے مدنظر وضو کے متبادل انتظامات کی گزارش کی تھی کیونکہ وضو خانہ‘ عدالت کے حکم پر مہربند ہے۔