آخر کار اپوزیشن لیڈر کے سی آر نے اسمبلی اجلاس میں شرکت کی
چندرشیکھرراو، جو کچھ عرصہ سے اسمبلی اجلاس میں شرکت نہیں کر رہے تھے، اس مرتبہ اجلاس کے آغاز سے ایک گھنٹہ قبل، یعنی صبح 10 بجے ہی اسمبلی پہنچ گئے۔
حیدرآباد: تلنگانہ کے اپوزیشن لیڈرکے چندرشیکھرراو اسمبلی اجلاس میں شریک ہوئے۔آج صبح بجٹ اجلاس میں شرکت کے لئے وہ حیدرآبادکے نندی ہلز میں واقع اپنے مکان سے اسمبلی کیلئے روانہ ہوئے۔
پارٹی کے ایم ایل ایز اور ایم ایل سیز نے ان کا استقبال کیا اور بعد ازاں انہوں نے اراکین اسمبلی کے ساتھ ایک اجلاس منعقد کیا۔ چندرشیکھرراو، جو کچھ عرصہ سے اسمبلی اجلاس میں شرکت نہیں کر رہے تھے، اس مرتبہ اجلاس کے آغاز سے ایک گھنٹہ قبل، یعنی صبح 10 بجے ہی اسمبلی پہنچ گئے۔
کانگریس کے ایم ایل ایز نے ان سے ملاقات کی،جی مہی پال ریڈی نے اپنے بھائی کی شادی کا دعوت نامہ کے سی آر کو پیش کیا۔ اسی طرح، کھمم ضلع کے اشواراؤپیٹ کے کانگریس ایم ایل اے، آدی نارائنا، نے بھی کے سی آر سے ملاقات کی۔
دلچسپ بات یہ ہے کہ یہ دونوں ایم ایل ایز ماضی میں بی آر ایس پارٹی سے منتخب ہوئے تھے اور بعد میں کانگریس میں شامل ہو کر دوبارہ منتخب ہوئے۔ واضح رہے کہ ریاست کی حکمران جماعت کانگریس کے لیڈران، اپوزیشن لیڈرکا عہدہ ہونے کے باوجود اسمبلی اجلا س میں عدم شرکت پر چندرشیکھرراو پر تنقید کررہے تھے۔
