بی جے پی کے سابق رکن اسمبلی چندرشیکھر مستعفی

حیدرآباد: تلنگانہ کے وقارآباد ضلع میں بی جے پی کو دھکہ پہنچا ہے کیونکہ اس کے سینئر لیڈراے چندرشیکھرنے پارٹی سے استعفی دے دیا ہے۔ انہوں نے پارٹی کے ریاستی صدر کشن ریڈی کو مکتوب استعفی اتوار کی صبح روانہ کردیا۔

سینئر دلت لیڈر و پانچ مرتبہ کے رکن اسمبلی گذشتہ چند ماہ سے پارٹی کی سرگرمیوں سے دوری اختیار کئے ہوئے تھے۔پارٹی کے ذرائع کے مطابق ان کے ساتھ پارٹی قیادت کے رویہ پر وہ ناخوش تھے۔

انہوں نے ورنگل میں گذشتہ ماہ منعقدہ وزیراعظم مودی کے جلسہ میں شرکت کیلئے ان کو پاس بھی جاری نہ کرنے پر پارٹی قیادت سے ناراضگی کااظہار کیا تھا۔چندرشیکھر1985سے مسلسل پانچ مرتبہ وقارآباد کے رکن اسمبلی رہے۔

2018میں انہوں نے آزاد امیدوار کے طورپر مقابلہ کیاتھا تاہم ان کو شکست ہوئی۔2019کے لوک سبھا انتخابات میں انہوں نے پداپلی سے کانگریس امیدوار کے طورپر مقابلہ کیاتاہم ان کو ایک مرتبہ پھر شکست ہوئی تھی جس کے بعد انہوں نے بی جے پی میں شمولیت اختیار کی تھی۔