آندھرا پردیش کی آرٹی سی بسوں میں خواتین کے لیے مفت سفر اسکیم 15 اگست سے شروع ہوگی

حیدرآباد: ریاست آندھرا پردیش میں خواتین کا ایک اور خواب شرمندۂ تعبیر ہونے جا رہا ہے۔ 15 اگست سے آر ٹی سی بسوں میں خواتین کے لیے مفت سفر کی سہولت شروع کی جا رہی ہے، جسے "استری شکتی” کے نام سے نافذ کیا جائے گا۔

اس اسکیم کو زبردست عوامی ردعمل ملنے کی توقع کے پیش نظر آر ٹی سی انتظامیہ اضافی بسیں فراہم کرنے کی تیاریاں کر رہی ہے۔

اس مقصد کے لیے آندھرا پردیش کے مختلف زونل ورکشاپس میں پرانی بسوں کو نئی شکل دینے کا عمل تیز رفتاری سے جاری ہے۔ رائل سیما اضلاع کے لیے کڈپہ زونل آر ٹی سی ورکشاپ میں یہ کام سب سے زیادہ تیزی سے ہو رہا ہے۔

حکام نے 100 بسوں کو نئی شکل دینے کا ہدف مقرر کیا ہے، جن میں سے 60 بسیں پہلے ہی تیار کر لی گئی ہیں جبکہ باقی 40 بسوں کی تیاری کے لیے عملہ دن رات محنت کر رہا ہے۔

ان بسوں کو پلے ولگو بسوں میں تبدیل کرنے کے لیے فی بس تقریباً 3 لاکھ روپے خرچ ہو رہے ہیں۔ آر ٹی سی حکام کا کہنا ہے کہ اسکیم کے آغاز سے قبل زیادہ سے زیادہ بسوں کو تیار کر کے خواتین کے لیے آرام دہ اور محفوظ سفر کو یقینی بنایا جائے گا۔