شملہ میں مسجد کے خلاف احتجاج کو گری راج سنگھ کی تائید

نئی دہلی: مرکزی وزیر گری راج سنگھ نے ہفتہ کے دن شملہ کے سنجولی علاقہ کی مسجد کے خلاف ہندو فرقہ کے پرزور احتجاج کی تائید کی۔ انہوں نے غیرقانونی تعمیرات کے خلاف متحد ہونے پر اکثریتی فرقہ کی تعریف کی۔

انہوں نے احتجاج کے شملہ ماڈل کی نہ صرف تائید کی بلکہ اسے ملک بھر میں دُہرانے کی وکالت کی۔ شملہ کے سنجولی علاقہ کی ایک مسجد کے غیرقانونی حصہ کو ڈھانے کے مطالبہ پر حال میں زبردست احتجاج ہوا تھا۔

گری راج سنگھ نے کہا کہ ہماچل پردیش کے ہندوؤں نے ملک کو متحد کردیا۔ زمین پر غیرقانونی قبضہ کرنے والے وقف بورڈ کواب للکارا گیا ہے۔ شملہ ماڈل نے ثابت کیا ہے کہ اگر ہندومتحد رہیں تو کوئی بھی ان کی زمین نہیں چھین سکتا۔

مرکزی وزیر نے آئی اے این ایس سے بات چیت میں اکثریتی فرقہ سے کہا کہ وہ شملہ ماڈل دُہرائے۔ انہوں نے دعویٰ کیا کہ ملک میں 3 لاکھ غیرقانونی مساجد ہیں۔ انہوں نے زور دے کر کہا کہ یہ غیرقانونی مساجد دہشت گردوں کے اڈے بن گئی ہیں۔