گرل فرینڈ نے زبردستی بوسہ لینے کی کوشش پر بوائے فرینڈ کی زبان کا حصہ کتردیا

پریاگ راج: اتر پردیش کے کانپور میں ایک حیران کن واقعہ پیش آیا جہاں ایک شخص نے اپنی سابقہ گرل فرینڈ کو زبردستی بوسہ دینے کی کوشش کی، جس پر اس نے شدید ردعمل ظاہر کرتے ہوئے اس کی زبان کا حصہ ہی کاٹ دیا(کتردیا) ۔

تفصیلات کے مطابق، 35 سالہ چامپی نامی شخص شادی شدہ ہے، لیکن اس کا ایک خاتون کے ساتھ غیر شادی شدہ تعلق چل رہا تھا۔ گزشتہ کچھ عرصے سے اس خاتون نے اس رشتے سے خود کو الگ کر لیا تھا کیونکہ اس کے والدین نے اس کی شادی کہیں اور طے کر دی تھی، جس کے بعد وہ چامپی سے دور رہنے لگی۔

رشتے کے خاتمے کو برداشت نہ کر پانے والا چامپی 17 نومبر کے دن اس خاتون سے ملنے پہنچا، جب وہ ایک تالاب کے قریب اکیلی موجود تھی۔ چامپی نے نہ صرف اس سے بات کرنے کی کوشش کی بلکہ اس پر زبردستی بوسہ لینے کی کوشش بھی کی۔

خاتون نے اس حرکت پر سخت مزاحمت کی اور اچانک اس کی زبان کو زور سے کاٹ لیا، جس سے چامپی کی زبان کا ایک حصہ الگ ہو گیا اور وہ شدید درد اور خون بہنے کی تکلیف میں چیخنے لگا۔

مقامی لوگوں نے اس کی چیخیں سن کر فوری طور پر اس کے خاندان کو اطلاع دی اور اسے پہلے قریبی ہیلتھ سنٹر لے جایا گیا، جہاں ابتدائی طبی امداد کے بعد اسے سرکاری اسپتال منتقل کر دیا گیا۔ دوسری جانب خاتون کی شکایت پر پولیس نے چامپی کے خلاف جنسی ہراسانی اور زبردستی کرنے کے الزامات کے تحت مقدمہ درج کر لیا ہے۔ پولیس حکام کے مطابق معاملے کی مکمل تفتیش جاری ہے اور خاتون کا بیان بھی قلمبند کر لیا گیا ہے۔ اس واقعے نے علاقے میں سنسنی پھیلا دی ہے اور لوگ اس غیر معمولی واقعے پر حیرت کا اظہار کر رہے ہیں۔