سنیما کی عظیم شخصیات کو پدم ایوارڈز 2026 سے نوازا گیا

نئی دہلی : ہندی سنیما کے لیجنڈری اداکار دھرمندر، جن کا 24 نومبر 2025 کو انتقال ہو گیا تھا اور جنہوں نے ہندستانی فلمی دنیا میں ایک ناقابلِ تلافی خلا چھوڑا، کو بعد از مرگ ہندستان کے دوسرے اعلیٰ ترین شہری اعزاز پدم وبھوشن سے نوازا گیا ہے۔

دھرمندر کے ساتھ ساتھ سینئر ملیالم اداکار مموٹی اور مشہور پلے بیک گلوکارہ الکا یاگنک کو ہندستان کے تیسرے اعلیٰ ترین شہری اعزاز پدم بھوشن کے لیے منتخب کیا گیا ہے۔یہ اعزازات رواں سال بعد میں صدرِ جمہوریہ دروپدی مرمو کے ہاتھوں راشٹرپتی بھون میں پیش کیے جائیں گے۔

اداکار آر۔ مادھون کو ہندستانی سنیما میں خدمات کے اعتراف میں پدم شری سے نوازا جائے گا۔ ہندی، تمل اور تیلگو فلموں میں اپنی ہمہ جہت اداکاری کے لیے مشہور مادھون نے بالی ووڈ میں رہنا ہے تیرے دل میں (2001) سے قدم رکھا، جبکہ منی رتنم کی فلم الائی پوتھے سے انہیں ابتدائی شہرت ملی۔

پدم شری کا اعزاز بعد از مرگ سینئر اداکار ستیش شاہ کو بھی دیا جائے گا، جن کا گزشتہ سال 25 اکتوبر کو انتقال ہو گیا تھا۔

معروف اشتہاری دنیا کے لیجنڈ پیوش پانڈے کو بھارتی اشتہاری صنعت میں دہائیوں پر محیط خدمات کے اعتراف میں بعد از مرگ پدم بھوشن سے نوازا گیا ہے۔ پیوش پانڈے کا انتقال 24 اکتوبر 2025 کو 70 برس کی عمر میں ہوا تھا۔ادھر بنگالی سنیما کے ممتاز اداکار پروسنجیت چٹرجی کو فنونِ لطیفہ میں خدمات کے اعتراف میں پدم شری دیا جائے گا۔

سال 2026 کے لیے صدرِ جمہوریہ نے مجموعی طور پر 131 پدم ایوارڈز کی منظوری دی ہے، جن میں 5 پدم وبھوشن، 13 پدم بھوشن اور 113 پدم شری شامل ہیں۔ ان میں 16 بعد از مرگ اعزازات اور 19 خواتین بھی شامل ہیں۔