دہلی۔این سی آر میں شدید دھند، اے کیو آئی ’خراب‘ زمرے میں

نئی دہلی: دہلی اور قومی دارالحکومت خطہ (این سی آر) کے کئی علاقوں میں شدید جبکہ متعدد مقامات پر درمیانی درجے کی دھند چھائی رہی، جس کے باعث حدِ نگاہ متاثر ہوئی اور ابتدائی اوقات میں سفری نظام درہم برہم رہا۔ اس صورتحال کے سبب ٹرینوں اور پروازوں میں تاخیر دیکھنے میں آئی۔

دہلی ایئرپورٹ نے مسافروں کو ہدایت دی کہ وہ اپنی پروازوں کے اوقات اور تازہ معلومات کے لیے متعلقہ ایئرلائنز سے رابطہ کریں، کیونکہ دھند کے باعث آپریشنز کو کیٹ۔تھری حالات کے تحت چلایا گیا، جس سے تاخیر کا امکان ہے۔

واضح رہے کہ کیٹ۔تھری نظام انتہائی کم یا قریباً صفر حدِ نگاہ میں بھی طیاروں کی لینڈنگ کی اجازت دیتا ہے، جب رن وے پر حدِ نگاہ 300 میٹر سے کم ہو جائے۔

این سی آر کے شہروں گڑگاؤں، نوئیڈا، غازی آباد، فرید آباد اور بہادر گڑھ میں بھی دھند کے باعث حدِ نگاہ متاثر رہی، جس سے صبح کے اوقات میں دفاتر جانے والے افراد کو خاصی دشواری کا سامنا کرنا پڑا۔

دریں اثنا، منگل کے روز دہلی میں کم از کم درجہ حرارت 9.4 ڈگری سیلسیس ریکارڈ کیا گیا، جو معمول سے قدرے زیادہ تھا۔ تاہم پرسکون ہواؤں کی موجودگی کے باعث سردی کی شدت برقرار رہی اور سردی کا احساس مزید بڑھ گیا۔

انڈین انسٹی ٹیوٹ آف ٹراپیکل میٹرولوجی کی پیش گوئی کے مطابق کم درجہ حرارت اور موسمی حالات کے باعث اے کیو آئی میں معمولی اضافہ ہو سکتا ہے، تاہم یہ ’خراب‘ درجے میں ہی برقرار رہے گا۔ مرکزی آلودگی کنٹرول بورڈ (سی پی سی بی) کے مطابق صبح 10 بجے شہر کا اوسط اے کیو آئی 260 ریکارڈ کیا گیا، جو خراب زمرے میں آتا ہے۔

محکمۂ موسمیات کے مطابق رات کے وقت ہلکی دھند اور کہر رہنے کا امکان ہے، جبکہ دن کے دوران زیادہ سے زیادہ درجہ حرارت 20 ڈگری سیلسیس کے آس پاس رہ سکتا ہے۔

محکمۂ موسمیات نے بدھ کے لیے بھی اسی طرح کے موسم کی پیش گوئی کی ہے۔ اندازہ ہے کہ آسمان جزوی طور پر ابر آلود رہے گا، شہر کے متعدد مقامات پر درمیانی درجے کی دھند جبکہ کچھ علاقوں میں صبح کے وقت شدید دھند چھائی رہ سکتی ہے۔