آرام گھر چوراہے پر تجاوزات مہم کے آغاز پر پولیس کی بھاری سیکیورٹی

رنگاریڈی: راجندرنگر سرکل کے تحت پلر نمبر 294 کے قریب آرم گھر کراس روڈ پر آج بلدی حکام کی جانب سے بڑے پیمانے پر ناجائز تجاوزات ہٹانے کی کارروائی کی گئی۔

راجندرنگر ڈپٹی کمشنر سورندر ریڈی کی ہدایت پر یہ خصوصی مہم ٹاؤن پلاننگ اے سی پی سری دھر کی نگرانی میں انجام دی گئی۔ کارروائی کے دوران پولیس کی بھاری نفری تعینات رہی تاکہ کسی قسم کی رکاوٹ یا ہنگامی صورتحال سے نمٹا جا سکے۔

بلدی عملہ نے فُٹ پاتھ اور سڑک کنارے قائم غیر مجاز ڈھانچوں، ٹھیلوں اور کاروباری قبضوں کو ہٹاتے ہوئے عوامی راستوں کو خالی کرایا۔ کارروائی کے دوران چند فٹ پاتھ فروشوں نے مزاحمت کی کوشش کی، تاہم پولیس نے فوری مداخلت کرتے ہوئے انہیں وہاں سے ہٹا دیا اور ماحول کو قابو میں رکھا۔

حکام کے مطابق علاقے میں ٹریفک روانی اور راہگیروں کی سہولت کو یقینی بنانے کے لیے مستقبل میں بھی ایسی مہمات جاری رہیں گی۔