تلنگانہ کے کئی اضلاع میں طوفانی بارش، آصف آباد میں 236.5ملی میٹر بارش ریکا رڈ کی گئی

دریائے گواوری کے قریب مقیم افراد سے نقل مکانی کی اپیل

تلنگانہ میں، کئی اضلاع میں گزشتہ 24 گھنٹوں کے دوران بھاری سے انتہائی شدید بارش ہوئی، جس سے ندی نالوں، جھیلوں اور سڑکوں میں پانی بھر گیا۔

بعض مقامات پر ٹریفک کا رخ موڑ دیا گیا ہے اور ہنگامی اقدامات کئے گئے ہیں۔ ملوگو اور کومارم بھیم آصف آباد اضلاع کو نقصان پہنچاہے، حکام نے ڈسٹرکٹ ڈیزاسٹر رسپانس فورس کو الرٹ پر رکھا ہوا ہے۔

صبح 3 بجے تک 24 گھنٹے کی بارش کے دوران آصف آباد ضلع کے بیجور میں سب سے زیادہ 236.5 ملی میٹر بارش ریکارڈ کی گئی، جبکہ ملوگو ضلع کے وینکٹا پورہ میں  218.3 ملی میٹر بارش ریکارڈ کی گئی۔

بھدردری ضلع کے کئی دیگر مقامات پرمو سلا دھار  بارش ریکارڈ کی گئی ہے۔ملوگو کے ضلع کلکٹرنے عوام پر زور دیا کہ وہ باہر نکلنے سے گریز کریں، خاص طور پر پلوں اور شاہراہوں کے پاس جانے گریز کریں۔ ماہی گیروں کو ساحل پر رہنے کا مشورہ دیا گیا۔

ضلع میں ایک ندی، رلا واگو پر ایک عارضی سڑک کو نقصان پہنچنے کے بعد ٹریفک میں خلل پڑا۔دریائے گوداوری کے قریب نشیبی علاقوں میں مقیم افراد سے نقل مکانی کے لیے تیار رہنے کو کہا گیا ہے، اور بحالی مراکز میں سہولیات تیار کی جا رہی ہیں۔ پرانے، غیر محفوظ گھروں میں رہنے والوں کو بھی محفوظ مقامات پر منتقل ہونے کی تاکید کی گئی۔