تلنگانہ کے یادادری بھونگیر، سوریاپیٹ اور نلگنڈہ اضلاع میں موسلا دھار بارش،موسی ندی کی سطح میں خطرناک حد تک اضافہ

حیدرآباد: تلنگانہ کے یادادری بھونگیر، سوریاپیٹ اور نلگنڈہ اضلاع میں موسلا دھار بارش کا سلسلہ جاری ہے۔

موسی ندی کے پانی کی سطح تیزی سے خطرناک حد تک بڑھ گئی ہے جس کے باعث بڑے پیمانہ پر رکاوٹیں پیدا ہو رہی ہیں۔ نشیبی علاقوں میں رہنے والوں کے لئے سیلابی انتباہ جاری کیا گیا ہے۔

اننت گری کی پہاڑیوں سے نکلنے والی موسی ندی جولورو۔رُدرولی کے قریب شدید خطرناک شکل اختیار کر چکی ہے اور قریبی بستیوں کے لئے بڑا خطرہ بن گئی ہے۔ عینی شاہدین کے مطابق یادادری بھونگیر ضلع میں ندی کے اوپر سے پانی کا شدید بہاو پلوں پر آگیا ہے۔

پوچم پلی۔بی بی نگرروڈ پر گاڑیوں کی آمدورفت مکمل طور پر بند ہوگئی جس سے سینکڑوں مسافر پھنس گئے اور اہم شاہراہوں پر ٹریفک کو موڑنا پڑا۔

ولی گونڈہ منڈل میں بھی صورتحال اتنی ہی سنگین ہے۔ چوٹ اپل اور بھونگیر کے درمیان آمدورفت بری طرح متاثر ہوئی ہے اور سیلابی علاقوں میں داخلے سے روکنے کے لئے رکاوٹیں کھڑی کر دی گئی ہیں۔