حزب اللہ کا ڈرون نتن یاہو کے بیڈروم تک پہنچ گیا، اسرائیل کااعتراف (ویڈیو)

تل ابیب : اسرائیل نے اعتراف کیا ہے کہ ہفتے کے روز حزب اللہ کے ڈرون نے اسرائیلی وزیراعظم نتن یاہو کی رہائش گاہ پر ان کے بیڈروم کی کھڑکی کو نشانہ بنایا تھا۔

خیال رہے کہ ہفتے کے روز لبنان کی مزاحمتی تنظیم حزب اللہ کی جانب سے اسرائیلی وزیراعظم نتن یاہو کی ذاتی رہائش گاہ پر ڈرون حملے کی اطلاعات سامنے آئی تھی۔سعودی میڈیا رپورٹس کے مطابق حزب اللہ کی جانب سے اسرائیل کے شہر قیصریہ میں ڈرون حملے میں اسرائیلی وزیراعظم نتن یاہو کی ذاتی رہائش گاہ کو نشانہ بنایا گیا۔

بعد ازاں اسرائیلی وزیراعظم آفس کی جانب سے جاری بیان میں بتایا گیا کہ حملے کے وقت نتن یاہو اور ان کی فیملی گھر پر موجود نہیں تھی۔اب اسرائیلی میڈیا کی جانب سے بتایا گیا ہیکہ اسرائیلی فوج نے خبر شائع کرنیکی اجازت دے دی ہے۔

اسرائیلی میڈیا کے مطابق حزب اللہ کے ڈرون سے اسرائیل کے شہر قیصریہ میں واقع نتن یاہو کی رہائش گاہ کو نقصان پہنچا۔ ڈرون سے نتن یاہو کے بیڈ روم کی کھڑکی کے شیشے تڑخ گئے تاہم مخصوص حفاظتی شیشے کی وجہ سے ڈرون اندر داخل نہ ہوسکا۔اسرائیلی میڈیا کی جانب سے جاری تصویر میں نتن یاہو کے گھر کا متاثرہ حصہ دکھایا گیا ہے۔

اس حوالے سے ایک تصویر بھی سامنے آئی ہے جس میں نتن یاہو کے گھر کا متاثرہ حصہ دکھایا گیا ہے۔حملے میں کسی شخص کے زخمی ہونے کی تصدیق نہیں کی گئی ہے۔ڈرون حملے کے بعد ایک بیان میں نتن یاہو نے اس کارروائی کو اپنے قتل کی کوشش قرار دیا اور کہا کہ ایرانی ایجنٹوں نے سنگین غلطی کی ہے۔

یہ حملہ انہیں جنگ روکنے پر مجبور نہیں کرسکتا۔دوسری جانب اسرائیلی وزیراعظم پر حملے کی کوشش پر اسرائیلی کابینہ اراکین آرمی چیف پر برس پڑے۔اسرائیلی آرمی چیف نے کابینہ کو بتایا کہ ہم نے متعدد ڈرونز کا حملہ ناکام بنایا، ہم نے اپنی صلاحیتوں میں اضافہ کیا ہے، ہم اپنی غلطیوں سے سیکھ رہے ہیں اور چیزوں کو بہتر کر رہے ہیں۔

ادھر حزب اللہ میڈیا آفس سربراہ محمد عفیف نے بیروت میں پریس بریفنگ کرتے ہوئے نتن یاہو کے گھر پر ہفتے کے روز ہونے والے حملے کی ذمہ داری قبول کرلی ہے۔محمد عفیف کا کہنا تھا کہ حزب اللہ نے نتن یاہو کے قیصریہ میں واقع گھر کو ڈرون سے نشانہ بنایا تھا، نتن یاہو گھر میں نہ ہونے کے باعث بچ گئے۔