حائیڈرا نے پرگتی نگر میں امبیر چیروو کو دی ایک نئی زندگی، مقامی عوام کا خیرمقدم

حیدرآباد کے پرگتی نگر (امبیر) چیروو کو اس کی اصل شناخت واپس دلانے کے لیے حائیڈرا نے بڑے پیمانے پر صفائی اور تحفظ مہم کا آغاز کر دیا ہے۔ کبھی پرندوں کی چہچہاہٹ اور خوشگوار ماحول کے لیے مشہور یہ جھیل وقت کے ساتھ بدبو اور گندگی کا مرکز بن گئی تھی، جس کے بعد مقامی لوگوں کی شکایات پر حائیڈرا میدان میں اتری۔

تقریباً 169 ایکڑ پر پھیلی پرگتی نگر چیروو کے اطراف میں غیر قانونی طور پر کوڑا کرکٹ اور جانوروں کے فضلے کی ڈمپنگ کی جا رہی تھی۔ جھیل کے بیچ سے گزرنے والی سڑک کے دونوں جانب مرغی، گوشت اور مچھلی فروخت کرنے والوں کی جانب سے فضلہ پھینکے جانے کے باعث نہ صرف شدید بدبو پھیل رہی تھی بلکہ پانی کا ذریعہ بھی آلودہ ہو رہا تھا۔

حائیڈرا نے پیر کے روز جھیل کے کناروں پر جمع کچرے کو ہٹانے کا کام شروع کیا۔ اب تک تقریباً 30 ٹرک کچرا صاف کیا جا چکا ہے جبکہ مزید 30 ٹرک کچرا نکالے جانے کا اندازہ لگایا گیا ہے۔ حکام کے مطابق ایک سے دو دن میں پورے علاقے کی صفائی مکمل کر لی جائے گی۔

جھیل کو آئندہ گندگی سے محفوظ رکھنے کے لیے حائیڈرا نے سخت اقدامات کا فیصلہ کیا ہے۔ کوڑا پھینکنے سے روکنے کے لیے جھیل کے اطراف فینسنگ لگائی جائے گی، سی سی ٹی وی کیمرے نصب کیے جا رہے ہیں اور مسلسل نگرانی کی جائے گی۔ اب تک چار گاڑیوں کو پکڑ کر مقدمات بھی درج کیے جا چکے ہیں۔

اس مہم میں مقامی عوام اور سماجی تنظیموں نے بھی حائیڈرا کے ساتھ تعاون کیا ہے۔ مقامی رہائشیوں نے جھیل کے تحفظ کے لیے گوشت اور مرغی کی دکانوں کو جھیل کے قریب سے منتقل کرنے کی تجویز دی ہے تاکہ جانوروں کا فضلہ دوبارہ یہاں نہ پھینکا جا سکے۔ شہریوں کا کہنا ہے کہ یہ جھیل کبھی علاقے کی پہچان تھی اور اب دوبارہ صاف ستھرا ماحول دیکھنے کو ملے گا۔

مقامی لوگوں نے حائیڈرا کے اقدام کی بھرپور تعریف کرتے ہوئے امید ظاہر کی ہے کہ آنے والے دنوں میں پرگتی نگر چیروو ایک بار پھر صاف، خوشگوار اور قدرتی حسن سے بھرپور منظر پیش کرے گی۔