حیدرآباد میں مزید 100 جھیلوں کو بحال کرنا حائیڈرا کا اگلا بڑا ہدف

حیدرآباد: HYDRA کمشنر رنگناتھ اپنی  ٹیم کے ساتھ بنگلور کا دورہ کریں گے۔ یہ دورہ بنگلور میں جھیلوں کی بحالی کے کام اور اس سے وابستہ طریقوں کا جائزہ لینے کے لیے کیا جا رہا ہے۔ حال ہی میں کمشنر رنگناتھ نے لیک مین آف انڈیا کہلانے والے آنند مولی گاوڑ سے ملاقات کی تھی، جس میں بنگلور میں آلودہ جھیلوں کو صاف اور دوبارہ زندہ کرنے کے اقدامات پر بات چیت ہوئی۔ اب کمشنر اور ان کی ٹیم ان تجربات کو حیدرآباد میں بھی لاگو کرنے کے امکانات کا جائزہ لیں گے۔

HYDRA کی ٹیم بنگلور میں مقامی تنظیموں اور ماہرین سے ملاقاتیں کرے گی تاکہ آلودہ جھیلوں کو بحال کرنے اور فاضل پانی کی صفائی کے طریقوں کا مطالعہ کیا جا سکے۔

وہاں کے کامیاب منصوبوں کی تفصیلات اور تجربات کو حیدرآباد کے مخصوص علاقوں میں نافذ کرنے کیلئے حکومتی حکام کے ساتھ مشاورت کی جائے گی۔

اس کے علاوہ، حالیہ دنوں میں HYDRA ٹیم نے بنگلور کے ڈیزاسٹر مینجمنٹ کے ماہرین کے ساتھ بھی ملاقات کی، جس میں انھوں نے ڈیزاسٹر مینجمنٹ کے نظام اور مختلف چیلنجز سے نمٹنے کے طریقہ کار کا مطالعہ کیا۔ بنگلور کا مطالعہ مکمل کرنے کے بعد، HYDRA ٹیم حیدرآباد میں جھیلوں جیسے باچھوپلی، مادھا پور، کوکٹ پلی، اور راجندر نگر کے جھیلوں کی بحالی پر کام کا آغاز کرے گی۔

مستقبل میں، HYDRA کا ہدف حیدرآباد میں مزید 100 جھیلوں کو بحال کرنا ہے۔ اس منصوبے کے تحت کچھ جھیلوں کو CSR فنڈز جبکہ دیگر کو HMDA کے مالی وسائل سے بحال کیا جائے گا۔