ہائیکورٹ کے احکام نظر انداز، ٹینک بنڈ میں رکاوٹیں ہٹاکر گنیش مورتیوں کا وسرجن، حکومت کو دھمکی؟
سمیتی کے قائدین کا کہنا ہے کہ پولیس کی جانب سے فلیکسیز، رکاوٹیں اور جولیاں اس طرح لگائی گئی ہیں جیسے ٹینک بنڈ پر کوئی مذہبی تقریب یا گنیش وسرجن نہ ہو، بلکہ یہ کسی اور مقصد کیلئے استعمال ہو رہا ہو۔
حیدرآباد: بھاگیہ نگر گنیش اتسو سمیتی نے حکومت کے خلاف شدید غم و غصے کا اظہار کیا ہے جس کی بنیادی وجہ ٹینک بنڈ پر گنیش وسرجن کیلئے کیے گئے ناقص انتظامات ہیں۔ سمیتی کے قائدین کا کہنا ہے کہ پولیس کی جانب سے فلیکسیز، رکاوٹیں اور جولیاں اس طرح لگائی گئی ہیں جیسے ٹینک بنڈ پر کوئی مذہبی تقریب یا گنیش وسرجن نہ ہو، بلکہ یہ کسی اور مقصد کیلئے استعمال ہو رہا ہو۔
سمیتی کے قائدین نے کہا کہ گنیش وسرجن ہندو مذہب کا ایک اہم تہوار ہے، اور حکومت کی جانب سے اس کے مناسب انتظامات نہ کرنا قابل مذمت ہے۔ ان کا کہنا تھا کہ پولیس کی جانب سے لگائی گئی رکاوٹیں نہ صرف وسرجن کے عمل کو متاثر کر رہی ہیں بلکہ عقیدت مندوں کے جذبات کو بھی ٹھیس پہنچا رہی ہیں۔
بھاگیہ نگر گنیش اتسو سمیتی کے عہدیداران نے حکومت کو دوپہر تک وسرجن کے انتظامات بہتر کرنے کی مہلت دی ہے، اور خبردار کیا ہے کہ اگر حکومت نے بروقت اقدام نہ کیا تو وہ شہر بھر میں احتجاج کریں گے۔ قائدین نے کہا کہ اگر حکومت نے ان کے مطالبات کو نظر انداز کیا تو احتجاج اتنا شدید ہوگا کہ پورا حیدرآباد مفلوج ہو جائے گا۔
سمیتی کے قائدین نے عوام سے بھی اپیل کی ہے کہ وہ اس احتجاج میں بھرپور حصہ لیں تاکہ حکومت کو اس بات کا احساس ہو کہ گنیش وسرجن ایک اہم مذہبی تہوار ہے جس کے مناسب انتظامات کیے بغیر اس تہوار کو بخوبی منانا ممکن نہیں ہے۔
