میدک میں جادو کے شبہ میں خاتون کو جلا دیا گیا

حیدرآباد: ریاست میں ایک45 سالہ خاتون کو مبینہ طور پر لوگوں کے ایک گروپ نے جادو ٹونا کے شبہ میں زندہ جلا دیا۔ یہ گھناونا واقعہ ضلع میدک میں پیش آیا۔ پولیس نے جمعہ کے روز یہ بات بتائی۔

 ضلع کے راما ئم پیٹ منڈل کے کتریال گاؤں میں جمعرات کی شب یہ واقعہ اس وقت پیش آیا جبکہ کم سے کم 6 افراد نے خاتون پر حملہ کردیا اور اس کے ہی گھر میں اسے جلا دیا۔

پولیس کے سینئر عہدیدار نے معلومات ملنے کے بعد کہا کہ ایک گروپ نے خاتون کی پٹائی اور پھر اسے آگ لگا دی۔ پولیس ٹیم فوری گاؤں پہونچی اور زخمی خاتون کو ہاسپٹل منتقل کیا جہاں وہ دوران علاج چل بسی۔

اس گروپ نے الزام عائد کیا کہ یہ خاتون ہمارے افراد خاندان کے خلاف جادو کررہی تھی، گروپ کے افراد کی خاتون سے بحث وتکرار ہوئی پھر اس گروپ کے افراد نے خاتون پر حملہ کردیا۔ پولیس نے قتل کا مقدمہ درج کرلیا ہے اور ملزمین کی شناخت کرلی ہے۔