ایران نے مزائلوں کی بوچھار کردی، 5 اسرائیلی ہلاک، 80 سے زائد زخمی

تہران (یو این آئی) ایران نے جوابی کارروائی ”وعدہ صادق 3“ کا آغاز کرتے ہوئے اسرائیل کے مختلف مقامات پر مزائل حملے کر دیے۔ گزشتہ رات سے جاری حملوں میں اسرائیل کی کئی عمارتیں تباہ ہوگئیں جب کہ ان حملوں کے نتیجہ میں خاتون سمیت 5 اسرائیلی شہری ہلاک اور 80 سے زائد زخمی ہوگئے۔

غیر ملکی خبر رساں ادارہ اے ایف پی کے مطابق ایران کی جانب سے اسرائیل پر حملوں کا سلسلہ جاری ہے اور اب تک 150 سے زائد ہائپر سانک اور بیالسٹک مزائلوں سے حملہ کیا گیا ہے۔ایران کی جانب سے تل ابیب میں اسرائیلی جوہری تحقیقی مرکز اور اسرائیلی ڈیفنس فورسس کے ہیڈکوارٹرس پر بھی مزائل حملہ کیا گیا۔

ٹائمس آف اسرائیل کی رپورٹ کے مطابق ایران کے حملوں میں تقریباً 80 افراد کے زخمی ہونے کی اطلاع ہے جن میں سے ایک خاتون سمیت 5 افراد زخموں کی تاب نہ لاتے ہوئے چل بسے۔ باقی افراد کو معمولی سے زخم آئے یا انہیں شدید ذہنی دباؤ کا سامنا کرنا پڑا۔ کئی افراد تاحال زیر علاج ہیں جب کہ کچھ زخمیوں کو گھر بھیج دیا گیا ہے۔

کئی مزائل وسطی اسرائیل میں گرے جن میں تل ابیب کے علاقہ میں بڑے دھماکوں کی آوازیں سنائی دیں اور کئی مقامات پر دھواں اٹھتا دیکھا گیا۔ایرانی میڈیا کی جانب سے دعویٰ کیا گیا ہے کہ حملوں میں اشددود‘ تل ابیب‘ حیفہ اور بیرشیبا میں اسٹراٹیجک اہداف کو نشانہ بنایا گیا ہے۔ایرانی حکام نے دعویٰ کیا ہے کہ کئی مزائل اور ڈرون تل ابیب تک پہنچنے میں کامیاب ہوئے جب کہ مزائل حملے آغاز ہیں۔

اسرائیل کا کوئی حصہ بھی محفوظ نہیں رہے گا۔اس سے قبل ایران نے ہفتہ کی علی الصبح اسرائیل پر چوتھا حملہ کیا جس میں ایک مزائل تل ابیب کے عین وسط میں ہدف پر آکر گرا تاہم اسرائیل نے ایران کی جانب سے داغے گئے زیادہ تر مزائل دفاعی نظام کے ذریعہ فضا ہی میں تباہ کرنے کا دعویٰ کیا ہے۔

اسرائیلی میڈیا کے مطابق ایران کی جانب سے داغے گئے مزائل تل ابیب میں گرے ہیں۔ دوسری جانب اسرائیلی فوج نے کہا ہے کہ ایران کی جانب سے داغے گئے مزائلوں کو روکنے کے لیے دفاعی نظام متحرک ہے جب کہ تمام شہریوں کو پناہ گاہوں کی طرف جانے کا حکم دیا گیا ہے۔علاوہ ازیں اسرائیلی فوج نے ایرانی حملوں سے تباہی کی فوٹیج بنانے پر پابندی عائد کر دی۔

اسرائیلی میڈیا کے مطابق نئے ایرانی حملہ میں تل ابیب میں 50 منزلہ عمارت کو نقصان پہنچا جب کہ اسرائیلی حکام نے شہریوں کو دوبارہ بنکرس میں جانے کی ہدایت دیدی۔ غیر ملکی خبر رساں ایجنسی نے ایران کی سرکاری خبر رساں ایجنسی ارنا کے حوالہ سے رپورٹ کیا کہ اسرائیل کے ایران پر اب تک کے سب سے بڑے حملوں کے بدلہ میں سینکڑوں بیالسٹک مزائل داغے گئے ہیں۔

امریکی نشریاتی ادارہ سی این این کی رپورٹ کے مطابق اسرائیلی دفاعی افواج کے ترجمان نے بتایا کہ ایران کی جانب سے اسرائیل کی طرف مزائلوں کی چوتھی لہر داغی گئی ہے۔بیان میں مزید کہا گیا کہ تھوڑی دیر پہلے صہیونی فوج نے ایران سے اسرائیل کی سرزمین کی طرف داغے گئے مزائلوں کی نشاندہی کی ہے۔ مزید کہا کہ عوام کو محفوظ پناہ گاہوں میں داخل ہونا چاہیے اور اگلی اطلاع تک وہاں رہنا چاہیے۔

اسرائیلی پولیس کے ترجمان کا کہنا ہے کہ اسرائیل پر ایرانی مزائل حملوں میں کوئی جانی نقصان نہیں ہوا‘ البتہ املاک کو نقصان پہنچا ہے۔امریکی نشریاتی ادارہ سی این این کی رپورٹ کے مطابق اسرائیلی پولیس ترجمان نے کہا ہے کہ ایرانی مزائل تل ابیب کے اندر ایک کمیونٹی پر گرا ہے لیکن تاحال کسی جانی نقصان کی اطلاع نہیں ملی۔

ترجمان نے بتایا کہ اس مرحلے پر کسی جانی نقصان کی اطلاع نہیں ملی ہے تاہم املاک کو نقصان پہنچا ہے۔امریکی نشریاتی ادارہ سی این این کے مطابق اسرائیل کی ہنگامی خدمات کے سربراہ ایلی بن نے بتایا کہ ایران کی طرف سے کیے گئے حملہ کے نتیجہ میں 7 افراد معمولی زخمی ہوئے۔