اسرائیل کا جنگی جنون عروج پر، 72 گھنٹے میں 6 ممالک پر حملے

غزہ: اسرائیل کا جنگی جنون عروج پر پہنچ گیا ہے۔ اس نے72 گھنٹے کے دوران 6 ممالک کو حملوں کا نشانہ بنایا۔ اسرائیل نے وحشی پن کا مظاہرہ کرتے ہوئے قطر، غزہ، یمن، شام، لبنان اور تیونس پر حملے کئے۔

غیر ملکی ذرائع ابلاغ کے مطابق اسرائیلی فوج کی جانب سے غزہ میں رات بھر بمباری جاری رہی- چوبیس گھنٹے میں 70 فلسطینی شہید ہوگئے۔ غزہ شہر میں کیمپ پر حملے میں بچے سمیت تین فلسطینی شہید ہوئے، جارحیت کے باوجود اسرائیلی صدر کہتے ہیں کہ ہم امن چاہتے ہیں اور ڈیل کیلئے تیار ہیں۔

لندن میں برطانوی وزیراعظم سے ملاقات کو اسرائیلی صدر نے مشکل ترین قرار دیا اور قطر پر حملے کا دفاع کیا۔ لندن میں برطانوی وزیراعظم کی اسرائیلی صدر سے ملاقات کیخلاف احتجاج کیا گیا، مظاہرین نے کہا اسرائیلی صدر نسل کشی کے مرتکب ہیں،انہیں فوری گرفتار کیا جائے۔

دوسری جانب اسرائیل کی جانب سے قطر میں حماس قائدین کو نشانہ بنانے کی ناکام کوشش کے بعد دنیا بھر سے مذمت کا سلسلہ جاری ہے۔ ایسے میں امریکی صدر ڈونلڈ ٹرمپ نے بھی نتن یاہو سے سوال پوچھ لیا۔

امریکی اخبار وال سٹریٹ جرنل کے مطابق صدر ڈونلڈ ٹرمپ اور اسرائیلی وزیراعظم کے درمیان فون کال پر گرما گرمی ہوئی، صدر ٹرمپ نے نتن یاہو سے پوچھ لیا کہ دوحہ میں حماس پر حملہ کیا کامیاب رہا؟صدر ٹرمپ نے کہا کہ قطر کی سرزمین پر حماس کو نشانہ بنانے کا فیصلہ دانشمندانہ نہیں تھا۔ نتن یاہو نے کہا ان کے پاس مختصر موقع تھا اور انہوں نے اس کا فائدہ اٹھایا۔

اخبار کے مطابق دونوں قائدین کے درمیان دوسری مرتبہ بھی ٹیلی فون پر رابطہ ہوا جس میں صدر ٹرمپ نے نتن یاہو سے استفسار کیا کہ کیا حملہ کامیاب تھا؟