جوبلی ہلز ضمنی انتخاب، بی آر ایس امیدوار ماگنٹی سنیتا گوپی ناتھ نے اپنا پرچہ نامزدگی داخل کردیا

حیدرآباد: جوبلی ہلز اسمبلی حلقہ کے ضمنی انتخاب کے سلسہے میں بھارتیہ راشٹر سمیتی (بی آر ایس) کی جانب سے امیدوار کے طور پر ماگنٹی سنیتا گوپی ناتھ نے پیر کے روز اپنا پہلا سیٹِ نامزدگی فارم داخل کیا۔

یہ نامزدگی شیخ پیٹ تحصیلدار دفتر میں پیش کی گئی، جہاں بی آر ایس کےکارگزار صدر کے ٹی آر، سابق وزیر ٹی سرینواس یادو، ارکان اسمبلی پدما راؤ، راول سری دھر ریڈی، دیدیپیا راؤ، وِشنو وردھن ریڈی، راج کمار پٹیل اور سمینہ یاسمین بھی ان کے ہمراہ موجود تھے۔

واضح رہے کہ سابق رکن اسمبلی مگنٹی گوپی ناتھ کے دیہانت کے بعد یہ نشست خالی ہوئی تھی، جس کے سبب الیکشن کمیشن نے ضمنی انتخاب کا اعلان کیا ہے۔

الیکشن کمیشن کے مطابق، نامزدگیوں کی داخلہ کی آخری تاریخ 21 اکتوبر مقرر کی گئی ہے، جبکہ 22 اکتوبر کو جانچ اور 24 اکتوبر تک دستبرداری کا عمل مکمل کیا جائے گا۔ پولنگ 11 نومبر کو منعقد ہوگی، اور گنتی 14 نومبر کو عمل میں لائی جائے گی۔ بی آر ایس قائدین کو اُمید ہے کہ پارٹی اپنی روایتی گرفت برقرار رکھتے ہوئے جوبلی ہلز نشست پر ایک مرتبہ پھر کامیابی حاصل کرے گی۔