جوبلی ہلز ضمنی انتخاب: سنجیو کمار لال اخراجات کے مبصر مقرر

حیدرآباد: حیدرآبادکے جوبلی ہلز اسمبلی حلقہ کے ضمنی انتخاب کے لئے نامزدگی کا عمل 13 اکتوبر سے شروع ہو رہا ہے۔

الیکشن کمیشن آف انڈیا نے سنجیو کمار لال، آئی آر ایس کو اخراجات کے مبصر کے طور پر مقرر کیا ہے۔ ضمنی انتخاب 11 نومبر کو منعقد ہوگا۔

سرکاری بیان کے مطابق، اخراجات کے مبصر انتخابی اخراجات کے عمل کی نگرانی کریں گے اور یہ یقینی بنائیں گے کہ الیکشن کمیشن آف انڈیا کی ہدایات کی سختی سے پابندی ہو، تاکہ انتخابی عمل میں شفافیت قائم رہے اور دولت کی طاقت کے اثر و رسوخ کو روکا جا سکے۔

تلنگانہ میں متوقع طور پر سب سے مہنگے ضمنی انتخابات میں سے ایک جوبلی ہلز ضمنی انتخاب میں ہر امیدوار کے اخراجات کی سرکاری حد 40 لاکھ روپے مقرر کی گئی ہے۔

کانگریس نے اپنے امیدوار کے طور پر وی نوین یادو کو میدان میں اتارا ہے، جبکہ اصل اپوزیشن بی آر ایس نے ماگنٹی گوپی ناتھ کی موت کے بعد ان کی بیوی ماگنٹی سومیا کوامیدواربنایا ہے۔