یوم تاسیس تلنگانہ تقریب، سونیاگاندھی کو مدعو کرنے پر سوال کا کشن ریڈی کو حق نہیں:وجئے شانتی

حیدرآباد: تلنگانہ کانگریس لیڈر وجئے شانتی نے یوم تاسیس تلنگانہ کی بڑے پیمانہ پر منائی جانے والی تقریب میں سابق صدرکانگریس سونیاگاندھی کو مدعو کئے جانے پر مرکزی وزیر سیاحت و تلنگانہ بی جے پی کے سربراہ کشن ریڈی کی جانب سے کئے گئے اعتراض کا جواب دیا ہے۔

انہوں نے کہا کہ بی جے پی کو کانگریس پر سوال کرنے کا کوئی حق نہیں ہے۔ انہوں نے ٹویٹ کرتے ہوئے کہا کہ سونیا گاندھی اس پروگرام کے لیے اہل ہیں۔

انہوں نے سوال کیا کہ ریاست کی تشکیل میں بی جے پی کا رول کیا تھا؟ انہوں نے کہا کہ ایسے جہدکار ہمیشہ سونیا گاندھی کا احترام کرتے ہیں جنہوں نے تلنگانہ کی تشکیل کو یقینی بنایا تھا۔

انہوں نے کہا کہ کانگریس کو سیاسی نقصان ہونے کے باوجود تلنگانہ کی تشکیل کو یقینی بنایاگیا۔انہوں نے واضح کیا کہ کشن ریڈی کو کانگریس سے سوال کرنے کا کوئی حق نہیں ہے۔