پین کارڈ کھو گیا؟ جانئے ڈپلیکیٹ کارڈ کیسے بنوائیں اور کتنی ہوگی فیس، جان کر ہو جائیں گے حیران

نئی دہلی: ہندوستان میں پین کارڈ (PAN Card) ایک نہایت اہم اور لازمی دستاویز ہے۔ بغیر پین کارڈ کے نہ تو بینک سے متعلق اہم کام مکمل ہو سکتے ہیں اور نہ ہی ٹیکس ریٹرن فائل کیا جا سکتا ہے۔ لیکن اکثر ایسا ہوتا ہے کہ لوگوں کا پین کارڈ کہیں گم یا چوری ہو جاتا ہے، جس کے بعد وہ پریشانی میں مبتلا ہو جاتے ہیں کہ اب کیا کیا جائے۔ خوش آئند بات یہ ہے کہ ایسی صورت میں آسانی سے ڈپلیکیٹ پین کارڈ حاصل کیا جا سکتا ہے اور اس پر صرف 50 روپے کا خرچ آتا ہے۔

سب سے پہلا قدم

اگر آپ کا پین کارڈ چوری ہو گیا ہے یا کہیں گم ہو گیا ہے تو سب سے پہلے آپ کو قریبی تھانے میں اس کی ایف آئی آر درج کرانی چاہئے۔ یہ قدم آپ کو مستقبل میں کسی بھی غیر قانونی استعمال سے بچاتا ہے۔ اگر کوئی شخص آپ کے گم شدہ پین کارڈ کا غلط استعمال کرتا ہے تو پولیس رپورٹ آپ کے پاس ایک مضبوط قانونی ثبوت کے طور پر موجود رہے گی۔ اس کے ساتھ ہی، ڈپلیکیٹ پین کارڈ کے لیے درخواست دیتے وقت یہ رپورٹ بھی کارآمد ثابت ہوتی ہے۔

ڈپلیکیٹ پین کارڈ کے لیے درخواست دینے کا طریقہ

ڈپلیکیٹ پین کارڈ بنوانے کے لیے آپ کو این ایس ڈی ایل (NSDL) کی سرکاری ویب سائٹ پر جانا ہوگا۔ وہاں "Reprint PAN Card” کے لنک پر کلک کرکے آن لائن درخواست دی جا سکتی ہے۔ طریقہ کار درج ذیل ہے:

سب سے پہلے اپنا پین کارڈ نمبر، آدھار نمبر اور تاریخِ پیدائش درج کریں۔

ہدایات کو پڑھ کر ٹِک لگائیں، کیپچا کوڈ درج کریں اور فارم سبمٹ کریں۔

اس کے بعد آپ کو اپنا پتہ اور پن کوڈ کنفرم کرنا ہوگا۔

رجسٹرڈ موبائل نمبر پر ایک او ٹی پی (OTP) موصول ہوگا، جسے درج کرنے کے بعد درخواست کا عمل آگے بڑھے گا۔

کتنی ہوگی فیس؟

ڈپلیکیٹ پین کارڈ کے لیے صرف 50 روپے فیس مقرر ہے۔ فیس ادا کرنے کے بعد درخواست قبول ہو جاتی ہے اور مقررہ وقت کے اندر نیا کارڈ آپ کے پتے پر بذریعہ ڈاک بھیج دیا جاتا ہے۔