مدینہ منورہ بس حادثہ، شہداء کی آخری رسومات کے بعد رشتہ داروں کی واپسی، وقف بورڈ کے چیرمین نے حکومتِ تلنگانہ کا شکریہ ادا کیا

حیدرآباد: مدینہ منورہ کے قریب گزشتہ ہفتے پیش آئے المناک بس حادثے میں شہید ہونے والے زائرین کے رشتہ دار اپنی آخری رسومات ادا کرنے کے بعد آج حیدرآباد واپس پہنچ گئے۔ ایئرپورٹ پر میڈیا سے بات کرتے ہوئے وقف بورڈ کے چیرمین خسرو پاشاہ نے حکومتِ تلنگانہ اور متعلقہ وزراء کا خصوصی شکریہ ادا کیا۔

خسرو پاشاہ نے بتایا کہ حادثہ پیش آنے کے فوراً بعد وزیراعلیٰ اے ریونت ریڈی نے متاثرہ خاندانوں کیلئے 24 گھنٹوں کے اندر مدینہ جانے کا مکمل انتظام کیا اور تمام اخراجات حکومت نے برداشت کیے۔ انہوں نے کہا کہ یہ اقدام متاثرہ خاندانوں کیلئے بڑی راحت اور حوصلے کا ذریعہ بنا۔

چیرمین وقف بورڈ نے مزید کہا کہ ریاستی وزیر محمد اظہر الدین، محمد ماجد حسین اور بی شفیع اللہ نے مدینہ منورہ پہنچ کر تمام انتظامات بخوبی انجام دیئے اور شہداء کی تدفین کے مراحل میں رشتہ داروں کی ہر ممکن مدد کی۔

واحد زندہ بچ جانے والے محمد شعیب کی صحت پر خصوصی نظر

حادثے میں واحد زندہ بچ جانے والے محمد شعیب کی صحت کے متعلق پوچھے گئے سوال پر خسرو پاشاہ نے بتایا کہ تلنگانہ حج کمیٹی کا ایک رکن سعودی عرب میں ان کے ساتھ موجود ہے اور ان کی صحت پر مسلسل نظر رکھی جا رہی ہے۔
انہوں نے کہا کہ:

“جیسے ہی ڈاکٹروں کی جانب سے اجازت ملے گی، محمد شعیب کو فوری طور پر حیدرآباد منتقل کیا جائے گا۔”

حادثے کی تفصیلات

واضح رہے کہ یہ افسوسناک حادثہ مدینہ منورہ سے تقریباً 25 کلومیٹر پہلے اس وقت پیش آیا جب زائرین کا قافلہ مکہ مکرمہ سے مدینہ کی جانب جا رہا تھا۔
سانحے میں:

• 46 افراد بس میں موجود تھے
• 45 زائرین موقع پر ہی شہید ہوئے
• 42 کا تعلق حیدرآباد سے تھا
• 3 کا تعلق بنگلورو سے تھا
• واحد زندہ بچنے والے محمد شعیب تاحال سعودی عرب میں زیرِ علاج ہیں

اس حادثے نے دونوں شہروں میں گہرے غم اور سوگ کی کیفیت پیدا کر دی ہے۔