محبوب نگر: اقلیتی تعلیم یافتہ نوجوانوں کے لیے چار ماہہ مفت فاؤنڈیشن کورس کی آخری تاریخ میں توسیع
شنکرا چاری نے کہا کہ یہ کورس چار ماہ پر مشتمل ہوگا جس میں تجربہ کار اور ماہر اساتذہ کے ذریعہ جنرل اسٹڈیز کی جامع کوچنگ فراہم کی جائے گی۔ انہوں نے اقلیتی نوجوانوں سے اپیل کی کہ وہ اس موقع سے بھرپور فائدہ اٹھائیں اور اپنی سرکاری ملازمت کے خواب کو حقیقت میں بدلیں۔
محبوب نگر: تلنگانہ حکومت اقلیتی طبقات سے تعلق رکھنے والے تعلیم یافتہ نوجوانوں کو سرکاری ملازمتوں کے حصول میں مدد فراہم کرنے کے لیے مسلسل اقدامات کر رہی ہے۔ اسی سلسلے میں محبوب نگر کے ضلع اقلیتی بہبود آفیسر جی شنکرا چاری نے ایک اہم پریس نوٹ جاری کرتے ہوئے بتایا کہ تلنگانہ مینارٹیز اسٹڈی سرکل و کیرئیر کونسلنگ سنٹر، حیدرآباد کی جانب سے فراہم کیے جانے والے چار ماہہ مفت فاؤنڈیشن کورس میں داخلے کی آخری تاریخ میں 21 اگست 2025 تک توسیع کر دی گئی ہے۔
یہ کورس اقلیتی برادریوں جیسے مسلمان، عیسائی، سکھ، پارسی، جین اور بدھ مذاہب سے تعلق رکھنے والے تعلیم یافتہ اور بے روزگار نوجوانوں کے لیے ایک سنہری موقع ہے تاکہ وہ مستقبل قریب میں ہونے والے مختلف سرکاری مسابقتی امتحانات جیسے گروپ I, II, III, IV، RRB، SSC، بینکنگ وغیرہ کی تیاری کرسکیں۔
شنکرا چاری نے کہا کہ یہ کورس چار ماہ پر مشتمل ہوگا جس میں تجربہ کار اور ماہر اساتذہ کے ذریعہ جنرل اسٹڈیز کی جامع کوچنگ فراہم کی جائے گی۔ انہوں نے اقلیتی نوجوانوں سے اپیل کی کہ وہ اس موقع سے بھرپور فائدہ اٹھائیں اور اپنی سرکاری ملازمت کے خواب کو حقیقت میں بدلیں۔
دلچسپی رکھنے والے امیدواروں سے کہا گیا ہے کہ وہ اپنی درخواست کے ساتھ تمام تعلیمی اسناد کی نقول 21 اگست کی شام 5 بجے تک درج ذیل پتہ پر جمع کروائیں:
دفتر: ضلع اقلیتی بہبود آفیسر، روم نمبر 205، سکینڈ فلور، IDOC بلڈنگ (کلکٹریٹ کمپلیکس)، محبوب نگر۔
درخواست فارم اور مزید تفصیلات کے لیے امیدوار ڈاکٹر منیب آفاق (موبائل: 9440970730) سے دفتر کے اوقات کار یعنی صبح 10:30 بجے سے شام 5:00 بجے تک رابطہ کر سکتے ہیں۔
