بنگلہ دیش سکریٹریٹ میں مہیب آتشزدگی ،سرکاری دستاویزات اور فرنیچر جل کر خاکستر

ڈھاکہ: ڈھاکہ میں بنگلہ دیش سکریٹریٹ کی ایک بڑی بلڈنگ میں مہیب آتشزدگی کا واقعہ پیش آیا جس کے نتیجہ میں سرکاری دستاویزات تباہ ہوگئے۔ حکام نے ایک اعلیٰ اختیاری تحقیقاتی کمیٹی تشکیل دی ہے کیونکہ یہ شبہ کیا جارہا ہے کہ یہ سبوتاج کی حرکت ہوسکتی ہے۔

بنگلہ دیش سکریٹریٹ کی بلڈنگ نمبر 7 میں آگ لگ گئی جس پر تقریباً6 گھنٹوں کی جدوجہد کے بعد قابو پایا جاسکا۔ عہدیداروں کے مطابق 9 منزلہ عمارت میں جمعرات کے صبح سویرے آگ بھڑک اٹھی۔ ہائی سیکوریٹی کامپلکس کے اندر واقع اس عمارت میں 7 وزارتوں کے دفتر ہیں۔ بہرحال کسی کے ہلاک یا زخمی ہونے کی کوئی اطلاع نہیں ملی ہے۔

 فائر سروس کے سربراہ بریگیڈیر جنرل زاہد کمال نے اخباری نمائندوں کو بتایا کہ کل رات نصف شب کے بعد عمارت کے 3 مقامات پر بیک وقت آگ بھڑک اٹھی۔ انہوں نے اشارہ دیا کہ یہ اتفاقی واقعہ نہیں ہوسکتا۔ عہدیداروں نے بتایا کہ آگ لگنے کی وجہ سے برقی سربراہی مسدود ہوگئی۔

 اس عمارت کے علاوہ دیگر وزارتوں میں بھی کام متاثر ہوا۔ سیکوریٹی ایجنسیوں نے کامپلکس کے اندر داخلہ بند کردیا تھا۔ اسٹاف کے کئی ارکان ِ عملہ اور عہدیداروں کو کامپلکس کے مرکزی حصہ میں جانے سے روک دیا گیا۔

انہوں نے بتایا کہ عمارت نمبر 7 کی چھٹویں‘ ساتویں اور آٹھویں منزلوں میں کئی کمروں کو نقصان پہنچا جہاں مقامی حکومت اور پوسٹ اینڈ ٹیلی کمیونیکیشنس وزارتوں کے دستاویزات کی بھاری تعداد فرنیچر کے ساتھ جل کر خاکستر ہوگئی۔

آگ بجھانے کے لئے استعمال کئے جانے والے پانی سے کئی دستاویزات کو نقصان پہنچا۔ عمارت کے مختلف حصوں میں کبوتر مردہ پائے گئے۔کئی کھڑکیوں کے شیشے ٹوٹے ہوئے پائے گئے۔