مولانا ابوالکلام آزادؒ کے افکار آج بھی قوم کے لیے مشعلِ راہ — طلبہ علم و محنت کو شعار بنائیں: مولانا صابر پاشاہ قادری

گورنمنٹ ہائی اسکول دارالشفاء، بہادرپورہ میں یومِ پیدائشِ مولانا ابوالکلام آزادؒ نہایت عقیدت و احترام کے ساتھ منایا گیا۔ اس موقع پر مہمانِ خصوصی کی حیثیت سے مولانا مفتی ڈاکٹر حافظ محمد صابر پاشاہ قادری، صدر شعبہ عربی، محکمۂ تعلیمِ متوسطہ و ثانوی (Government of Telangana) و چیئرمین لینگویجز ڈویلپمنٹ آرگنائزیشن نے شرکت کرتے ہوئے مولانا آزادؒ کی علمی، فکری اور تعلیمی خدمات پر روشنی ڈالی۔

مولانا مفتی ڈاکٹر حافظ محمد صابر پاشاہ قادری نے اپنے خطاب میں کہا کہ مولانا ابوالکلام آزادؒ نہ صرف ایک عظیم رہنما تھے بلکہ علم و بصیرت، سیاست و خطابت اور اصلاحِ قوم کے میدان میں ایک منفرد شخصیت کے حامل تھے۔ وہ ان رہنماؤں میں سے تھے جنہوں نے آزادیِ ہند کی جدوجہد میں اپنی پوری زندگی وقف کر دی۔ ان کی خطابت، تحریر اور سیاسی حکمتِ عملی نے قوم کے دلوں میں تعلیم، اتحاد اور آزادی کا شعور پیدا کیا۔

انہوں نے مزید کہا کہ مولانا آزادؒ نے ہمیشہ تعلیم کو قوم کی ترقی کی بنیاد قرار دیا۔ انہی کی دور اندیشی اور وژن کے نتیجے میں ملک میں یونیورسٹی گرانٹس کمیشن (UGC) اور انڈین انسٹی ٹیوٹس آف ٹیکنالوجی (IITs) جیسے تعلیمی ادارے قائم ہوئے۔ اسی وجہ سے ان کے یومِ ولادت کو آج “قومی یومِ تعلیم” کے طور پر منایا جاتا ہے۔

مولانا صابر پاشاہ قادری نے طلبہ کو نصیحت کرتے ہوئے کہا کہ مولانا آزادؒ نے اپنی محنت، مطالعہ اور علم دوستی کے ذریعے ایک عظیم مفکر اور رہنما کا درجہ حاصل کیا۔ طلبہ کو چاہیے کہ وہ بھی علم کے راستے پر استقامت سے گامزن رہیں، کتابوں سے دوستی پیدا کریں، مطالعہ کا ذوق بیدار کریں اور اپنی تعلیمی زندگی کو سنجیدگی سے اختیار کریں۔ انہوں نے کہا کہ “اگر آپ بھی علم و محنت کے راستے پر چلیں گے تو آنے والے وقت میں آپ قوم کے معلم، رہنما اور خطیب بن سکتے ہیں۔”

تقریب کے اختتام پر مولانا آزادؒ کی علمی و سیاسی خدمات کو خراجِ عقیدت پیش کیا گیا۔ مقررین نے کہا کہ مولانا آزادؒ کے افکار آج بھی قوم کے لیے مشعلِ راہ ہیں اور ان کی تعلیمات نسلِ نو کے لیے ایک رہنما اصول کی حیثیت رکھتی ہیں۔