ماونواز لیڈر کشن جی کی اہلیہ سجاتکا زیرحراست!

حیدرآباد (یواین آئی) ایک اہم پیشرفت میں ماونواز لیڈرکشن جی کی اہلیہ سجاتکا، جو کلپنا کے نام سے بھی مشہور ہیں، مبینہ طور پرحراست میں لے لی گئی ہیں۔ غیر مصدقہ اطلاعات کے مطابق سجاتکا کو ضلع محبوب نگر میں حراست میں لیا گیا۔

اس وقت وہ جنوبی سب زونل بیورو کی انچارج کے طور پر خدمات انجام دے رہی ہیں اور ماونواز پارٹی کی مرکزی کمیٹی کی رکن بھی ہیں۔ اطلاعات کے مطابق سجاتکا کو تین دیگر ماونوازوں مائنے بائی، پدما اور جھانسی بائی کے ساتھ حراست میں لیا گیا، ٹھوس انٹلی جنس معلومات کی بنیاد پر یہ کارروائی کی گئی تاہم، پولیس حکام کی جانب سے ابھی تک باضابطہ تصدیق نہیں کی گئی ہے۔

سجاتکاکے شوہرکشن جی سرکردہ ماونواز لیڈرتھے، جنہیں 2011 میں مغربی بنگال کے بوری شول میں سیکوریٹی فورس کے ساتھ انکاونٹرمیں ہلاک ہوگئے تھے۔

کشن جی کا تعلق ضلع پداپلی سے تھا۔سجاتکا مبینہ طور پر کئی سالوں سے ماونواز سرگرمیوں میں ملوث رہی ہیں اور شوہر کی موت کے بعد سے وہ حکام کو مطلوب تھیں۔ ان کی عمر اس وقت تقریباً 60 سال بتائی جاتی ہے۔

ذرائع کے مطابق، وہ چھتیس گڑھ کے جنوبی بستر کے جنگلاتی علاقوں میں ماوسٹ پارٹی کی کارروائیوں کی نگرانی میں مصروف تھیں۔ یہ واضح نہیں ہے کہ وہ اپنے ٹھکانے سے کیوں باہر آئیں۔ قیاس آرائی کی جا رہی ہے کہ شاید وہ علاج کے لیے محبوب نگرگئی ہوں یا اس علاقہ میں پناہ لینے آئی ہوں۔