تلنگانہ کے سیلاب زدہ علاقوں سے لوگوں کو بچانے کے لیے این ڈی آر ایف کا آپریشن جاری

حیدرآباد: نیشنل ڈیزاسٹر ریسپانس فورس (این ڈی آر ایف) نے تلنگانہ کے ملوگو ضلع کے کونڈائی گاؤں میں سیلاب میں پھنسے ہوئے لوگوں کو بچانے کے لیے آپریشن شروع کیا۔

این ڈی آر ایف کی ٹیمیں ضلع انتظامیہ اور پولیس کی مدد سے پانی میں ڈوبے گاؤں کے لوگوں کو جمپنا واگو نامی ندی سے بچانے کی کوشش کر رہی ہے۔

گاؤں والوں نے مدد کے انتظار میں چند گھروں کی چھتوں پر رات گزاری۔ تقریباً 60-70 لوگ بغیر خوراک اور پانی کے پھنسے ہوئے بتائے جارہے ہیں۔

گاؤں والوں کو بچانے کے لیے کشتیاں لگائی جا رہی ہیں۔ قبائلی بہبود کی وزیر ستیوتی راٹھور نے بھی بچاؤ آپریشن کے لیے فوج کے ہیلی کاپٹروں کی درخواست کی ہے۔ وہ بچاؤ کے کام کی نگرانی کر رہی ہیں۔

بدھ کی رات کو ہونے والی غیر معمولی بارش سے ملوگو ضلع میں اچانک سیلاب آگیا۔ ایٹر نگرم، منگاپیٹ اور ایس ایس تاڈوائی منڈلوں میں کم از کم 30 گاؤں اور بستیاں زیر آب آگئیں۔

جمعرات کو اسی ضلع کے مورانچاپلی سے سینکڑوں دیہاتیوں کو این ڈی آر ایف نے بچایا۔