ونڈے ورلڈ کپ: ہندوستان اور پاکستان کا میچ نوراتری کی وجہ سے ایک دن قبل ہوسکتا ہے؟

ممبئی: ہندوستان اور پاکستان کے درمیان احمد آباد کے نریندرمودی اسٹیڈیم میں 15اکتوبر کو منعقد ہونے والا ون ڈے ورلڈ کپ کا مقابلہ ایک روز قبل 14اکتوبر کو منعقد کیا جا سکتا ہے۔

کرک بزکی طرف سے چہارشنبہ کو جاری ایک رپورٹ کے مطابق، احمد آباد پولیس نے انڈین کرکٹ کنٹرول بورڈ (بی سی سی آئی) سے کہا ہے کہ 15 اکتوبر کو نوراتری کا پہلا دن ہونے کی وجہ سے وہ ہندوستان پاکستان میچ میں سیکیورٹی نہیں فراہم کر سکے گی۔

رپورٹ کے مطابق، بی سی سی آئی اب نئے متبادل تلاش کر رہا ہے اور اس کے تحت سخت حریف کے درمیان مقابلہ14اکتوبر کو بھی منعقد ہو سکتا ہے۔

یہ منصوبہ حالانکہ پاکستان کے لئے ناقابل قبول ہو سکتاہے کیونکہ اسے 12اکتوبرکو سری لنکا کے ساتھ کھیلنا ہے۔ حیدرآباد میں سری لنکا کا سامنا کرنے کے 48گھنٹے بعد احمد آباد میں ہندوستان سے مقابلہ کرنا پاکستان کے لئے مشکل ہو سکتا ہے۔

اس کے علاوہ 14اکتوبر کو چینائی میں نیوزی لینڈ بنام بنگلہ دیش (صبح 10:30بجے سے شروع) اور نئی دہلی میں انگلینڈ بنام افغانستان (دوپہر دو بجے سے شروع ) سمیت دو اورمیچ متعین ہیں ۔ اسی دن ہندوستان کے ساتھ تیسرا میچ جوڑنے سے براڈ کاسٹر اور منتظمین کے لئے تشویش پیدا ہو سکتی ہے۔

رپورٹ کے مطابق ، بی سی سی آئی نے تمام انٹرنیشنل کرکٹ کونسل (آئی سی سی ) یا پاکستان کرکٹ بورڈ ( پی سی بی) سے کوئی رسمی بات چیت نہیں کی جا سکتی ہے۔ نئی دہلی میں جمعرات کو ہونے والے میزبان فیڈریشنوں کی میٹنگ میں کوئی نہ کوئی حل نکالا جا سکتا ہے ۔

ون ڈے ورلڈ کپ پانچ اکتوبر سے احمد آباد میں شروع ہوکر19نومبر کو احمد آباد میں ہی مکمل ہوگا۔