’’ایک دن میں چیف منسٹر بنوں گی اور 2014 سے ہوئی ہر بے ضابطگی کی تحقیقات کرواؤں گی‘‘ کویتا کے بیان نے مچائی سیاسی دنیا میں ہلچل

تلنگانہ کی سیاست میں آج اس وقت ہلچل مچ گئی جب تلنگانہ جاگروتی کی صدر کے کویتا نے بی آر ایس اور بی جے پی کے چند اہم لیڈروں کے خلاف قانونی نوٹس جاری کرتے ہوئے انہیں ایک ہفتے کے اندر عوامی معافی مانگنے کا الٹی میٹم دیا۔ کویتا نے واضح کہا کہ وہ اب خاموش نہیں رہیں گی اور اگر کسی نے ان کے خلاف جھوٹے الزامات لگائے تو وہ ان کا بھرپور جواب دیں گی۔

قانونی نوٹس جنہیں بھیجے گئے، ان میں شامل ہیں:
ٹی نیوز تلگو (بی آر ایس کی ملکیت)، بی آر ایس ایم ایل اے مدھاورم کرشنا راؤ، اور بی جے پی ایم ایل اے الیٹی مہیشور ریڈی۔

کویتا نے کہا کہ ان کے اور ان کے شوہر کے خلاف جھوٹے الزامات لگائے جارہے ہیں۔ انہوں نے سخت لہجے میں کہا:
"میرے شوہر نے کبھی سرکاری زمین پر کاروبار نہیں کیا، جیسا کہ آپ کرتے رہے ہیں۔ انہوں نے ہمیشہ نجی اراضی پر ہی کاروبار کیا۔ آئی ڈی پی ایل کے پاس والی زمین سے میرا یا میرے شوہر کا کوئی تعلق نہیں۔‘‘
انہوں نے کہا کہ جھوٹے الزامات لگانے والوں کو عدالت میں جواب دینا پڑے گا اگر وہ معافی نہیں مانگتے۔

کویتا نے بڑا دعویٰ کرتے ہوئے کہا:
"ایک دن میں چیف منسٹر بنوں گی… اور 2014 سے ہونے والی ہر بے ضابطگی کی مکمل تحقیقات کرواؤں گی۔”
انہوں نے مزید کہا کہ یہ ابھی صرف "ٹاسک” ہے، اصل "ٹیسٹ میچ” آگے ہے۔

اپنے بیان میں کویتا نے بی آر ایس لیڈروں پر زمین اور جھیل پر ناجائز قبضوں کے سنگین الزامات بھی لگائے۔ انہوں نے کہا کہ کوکٹ پلی ایم ایل اے مدھاورم کرشنا راؤ کے بیٹے کا تعلق Praneeth Pranav Villas سے ہے جہاں مبینہ طور پر جھیل پر قبضہ کرکے عوامی رسائی روک دی گئی ہے۔ کویتا نے چیلنج کرتے ہوئے کہا:
"اگر HYDRAA میں ہمت ہے تو وہ اس جھیل کی طرف راستہ کھول کر تمام قبضے ہٹا کر دکھائے۔”

کویتا نے یہ بھی الزام لگایا کہ بی آر ایس دورِ حکومت میں لیز پر دی گئی زمینوں کو تبدیل کرکے ‘‘کھڑکیاں کھولی گئیں’’ جن سے کرپشن بڑھا۔ انہوں نے کہا:
"بی آر ایس نے کرپشن کی کھڑکیاں کھولیں… اور کانگریس نے آتے ہی دروازے ہی کھول دیے۔”

کویتا نے یہ بھی دعویٰ کیا کہ
’’ہریش راؤ اور بی آر ایس پارٹی مجھ پر حملہ کرنے کے لیے مہیشور ریڈی اور کرشنا راؤ کو استعمال کر رہی ہے۔‘‘

انہوں نے کہا کہ ان کے خلاف چلائی جانے والی یہ مہم منصوبہ بند ہے اور ان کی سیاسی ساکھ کو نقصان پہنچانے کے لیے کی جارہی ہے۔

کویتا کے ان بیانات اور قانونی کارروائی نے تلنگانہ کی سیاست میں نئی گرمی پیدا کردی ہے۔ ان کا یہ اعلان کہ وہ ایک دن چیف منسٹر بن کر 2014 سے اب تک کی ہر بے ضابطگی کی جانچ کریں گی، سیاسی حلقوں میں زبردست بحث کا موضوع بن گیا ہے۔ آنے والے دنوں میں اس معاملے پر مزید تلخ سیاسی ٹکراؤ دیکھنے کا امکان ہے۔