سستے اسمارٹ فون کے نام پر آن لائن دھوکہ دہی گینگ بے نقاب
آرڈر ملنے کے بعد ملزمین پوسٹل سروس کے ذریعے پارسل بھیجتے، لیکن اس میں موبائل فون کے بجائے سستے سامان رکھ دیتے تھے۔ اس طرح وہ آسانی سے لوگوں کو دھوکہ دے کر رقم وصول کرتے رہے۔
حیدرآباد : سستے داموں Samsung اسمارٹ فون فروخت کرنے کا جھانسہ دے کر معصوم عوام کو دھوکہ دینے والے ایک منظم گروہ کا پردہ فاش کرتے ہوئے پولیس نے چار ملزمین کو گرفتار کر لیا ہے، جبکہ ایک خاتون ملزمہ فرار بتائی جاتی ہے۔
شمس آباد زون کمشنر ٹاسک فورس کے عہدیداروں نے راجندر نگر پولیس کے ساتھ مشترکہ کارروائی کرتے ہوئے اس گینگ کو پکڑا۔ گرفتار ملزمین آن لائن کے ذریعے لوگوں کو کم قیمت میں سام سنگ موبائل فون فراہم کرنے کا لالچ دیتے تھے، لیکن پارسل کے ذریعے موبائل فون کے بجائے بلوٹوتھ اسپیکرز، گلاسز اور دیگر غیر متعلقہ اشیاء بھیج کر رقم ہڑپ کر لیتے تھے۔
گرفتار ملزمین
ایس۔ وجے کمار (33 سال) – آن لائن کاروبار، ساکن بنگلورو
وائی۔ شیو کمار (31 سال) – آن لائن کاروبار، ساکن کاٹیدان (حیدرآباد)، اصل تعلق کرناٹک
مودین (32 سال) – آفس بوائے، ساکن بھوانی نگر، اصل تعلق بیدر
ششیکانت (22 سال) – آفس بوائے، ساکن حیدر گُوڑا، اصل تعلق بیدر
فرار ملزمہ : منجولا – ساکن بنگلورو
ضبط شدہ سامان
پولیس نے کارروائی کے دوران بڑی مقدار میں الیکٹرانک اور دیگر سامان ضبط کیا، جن میں کمپیوٹر مانیٹرز، لیپ ٹاپ، سی پی یوز، پرنٹر، ہارڈ ڈسک، موبائل فونز، 27 لینڈ لائن فون، 30 بلوٹوتھ اسپیکرز، 133 ٹمبلرز، تقریباً 150 ڈبے ہربل مصنوعات، 51 سم کارڈز (ایئرٹیل، ووڈافون، بی ایس این ایل) اور 1 لاکھ 40 ہزار روپے نقد شامل ہیں۔
گینگ پہلے لوگوں کا موبائل ڈیٹا حاصل کرتا تھا، جو منجولا نامی خاتون فراہم کرتی تھی۔ وہ ایک لاکھ فون نمبرز کا ڈیٹا 10 ہزار روپے میں فروخت کرتی تھی۔ اس کے بعد ٹیلی کالرز صارفین کو فون کر کے 3500 روپے میں سام سنگ اسمارٹ فون دینے کی پیشکش کرتے تھے۔
آرڈر ملنے کے بعد ملزمین پوسٹل سروس کے ذریعے پارسل بھیجتے، لیکن اس میں موبائل فون کے بجائے سستے سامان رکھ دیتے تھے۔ اس طرح وہ آسانی سے لوگوں کو دھوکہ دے کر رقم وصول کرتے رہے۔
پولیس کے مطابق 2021 سے اب تک اس گروہ نے تقریباً 3880 افراد کو دھوکہ دے کر لاکھوں روپے کما لیے۔
اطلاع ملنے پر ٹاسک فورس اور راجندر نگر پولیس نے مشترکہ کارروائی کرتے ہوئے ملزمین کو گرفتار کیا اور ضبط شدہ سامان کو تحویل میں لے لیا۔ بعد ازاں گرفتار ملزمین کو مزید تفتیش کے لیے راجندر نگر پولیس اسٹیشن کے حوالے کر دیا گیا ہے۔
یہ کارروائی شمس آباد زون ٹاسک فورس انسپکٹر کے۔ وینکٹ ریڈی کی نگرانی میں، ایس آئیز کے۔ ناگراجو، ایس۔ شیشو، ایم۔ روی کمار اور دیگر پولیس عملے کی مدد سے انجام دی گئی۔
