دہلی میں کہرے کے سبب 100 سے زائد پروازیں منسوخ
دہلی ہوائی اڈے کی ویب سائٹ کے مطابق، صبح آٹھ بجے تک مختلف ایئرلائنز کی دہلی سے روانہ ہونے والی 50 سے زائد پروازیں منسوخ کی گئیں۔ اس کے علاوہ دیگر شہروں سے دہلی آنے والی تقریباً اتنی ہی پروازیں بھی منسوخ رہیں۔ مزید برآں، 200 سے زائد پروازوں میں تاخیر کی اطلاع ہے۔
نئی دہلی: دہلی کے اندرا گاندھی بین الاقوامی ہوائی اڈے پر کہرے کے سبب منگل کے روز 100 سے زائد پروازیں منسوخ کر دی گئیں، جبکہ کم از کم 200 پروازیں تاخیرسے پرواز کریں گی۔
دہلی ہوائی اڈے کی ویب سائٹ کے مطابق، صبح آٹھ بجے تک مختلف ایئرلائنز کی دہلی سے روانہ ہونے والی 50 سے زائد پروازیں منسوخ کی گئیں۔ اس کے علاوہ دیگر شہروں سے دہلی آنے والی تقریباً اتنی ہی پروازیں بھی منسوخ رہیں۔ مزید برآں، 200 سے زائد پروازوں میں تاخیر کی اطلاع ہے۔
دہلی ہوائی اڈے نے اپنے سوشل میڈیا اکاؤنٹ پر بتایا کہ پیر کی رات 10 بجے کے بعد سے ہی کیٹ-3 طریقۂ کار کے تحت پروازوں کی آمد و رفت شروع کر دی گئی تھی۔ رات دو بجے کے بعد کہرا چھٹنا شروع ہوا، لیکن اس کا اثر صبح تک برقرار رہا۔
کیٹ-3 طریقۂ کار کے دوران صرف وہی طیارے اور عملہ لینڈنگ اور ٹیک آف کر سکتے ہیں جو کیٹ-3 کے لیے اہل ہوتے ہیں۔
کیٹ-3 سہولت آلات کی مدد سے لینڈنگ اور ٹیک آف کا سب سے جدید نظام ہے، جو انتہائی گھنے کہرے کی صورتحال میں استعمال کیا جاتا ہے۔
ایئرلائن کمپنیوں نے بھی مسافروں کے لیے ہدایات جاری کی ہیں اور انہیں مشورہ دیا ہے کہ ہوائی اڈے روانہ ہونے سے قبل اپنی پرواز کی صورتحال ضرور معلوم کر لیں۔
