ممبئی ایئرپورٹ کے قریب نماز کی جگہ کی درخواست مسترد، ہائی کورٹ نے سیکورٹی خدشات کو ترجیح قرار دیا

ممبئی: بامبے ہائی کورٹ نے ممبئی کے چھترپتی شیواجی مہاراج انٹرنیشنل ایئرپورٹ کے قریب رمضان کے دوران نماز ادا کرنے کے لیے جگہ فراہم کرنے سے متعلق ایک درخواست مسترد کر دی۔ عدالت نے کہا کہ ایئرپورٹ جیسے حساس مقامات پر سکیورٹی کو اولین ترجیح دی جانی چاہیے اور اس معاملے میں کسی قسم کا سمجھوتہ نہیں کیا جا سکتا۔

یہ معاملہ جسٹس بی پی کولابا والا اور جسٹس فردوس پونے والا پر مشتمل ڈویژن بنچ کے سامنے سماعت کے لیے پیش ہوا۔ عدالت نے اپنے مشاہدے میں کہا کہ ایئرپورٹ جیسے ہائی رسک علاقوں میں سکیورٹی کو برقرار رکھنا نہایت اہم ہے اور اس سے سمجھوتہ ممکن نہیں۔

عدالت نے یہ بھی تسلیم کیا کہ رمضان کا مہینہ درخواست گزاروں کے لیے مذہبی اعتبار سے خاص اہمیت رکھتا ہے، تاہم عدالت کے مطابق کسی مخصوص عوامی مقام پر نماز ادا کرنے کا کوئی قانونی یا مذہبی حق موجود نہیں ہے، خصوصاً ایسے مقامات پر جہاں عوامی سلامتی متاثر ہو سکتی ہو۔

سماعت کے دوران مہاراشٹر حکومت نے عدالت کو بتایا کہ درخواست کے تناظر میں سات متبادل مقامات کا جائزہ لیا گیا تھا۔ تاہم حکام نے یہ نتیجہ اخذ کیا کہ سکیورٹی خدشات، علاقے میں شدید ٹریفک اور ایئرپورٹ سے متعلق جاری ترقیاتی منصوبوں کی وجہ سے کوئی بھی مقام مناسب نہیں پایا گیا۔

عدالت نے یہ بھی نشاندہی کی کہ اس مقام سے تقریباً ایک کلومیٹر کے فاصلے پر ایک مدرسہ موجود ہے، جہاں ڈرائیور حضرات نماز ادا کر سکتے ہیں۔ اس کے علاوہ ایئرپورٹ کے اندر مسافروں کے لیے پہلے ہی خصوصی عبادت گاہیں موجود ہیں۔

اگرچہ عدالت نے فوری طور پر درخواست گزاروں کو کوئی راحت نہیں دی، تاہم یہ بھی کہا کہ یونین چاہے تو ایئرپورٹس اتھارٹی آف انڈیا یا ممبئی انٹرنیشنل ایئرپورٹ لمیٹڈ کے سامنے باضابطہ نمائندگی پیش کر سکتی ہے۔ عدالت کے مطابق ٹرمینل 1 کی آئندہ ری ڈیولپمنٹ کے دوران اس طرح کی درخواست پر غور کیا جا سکتا ہے۔

یہ عرضی ٹیکسی-رکشا اولا-اوبر مینز یونین کی جانب سے دائر کی گئی تھی۔ یونین نے 2025 میں ڈومیسٹک ٹرمینل کے قریب موجود ایک عارضی نماز گاہ کو منہدم کیے جانے کے بعد عدالت سے رجوع کیا تھا۔ اس عارضی شیڈ کو پہلے رمضان کے دوران ڈرائیور حضرات نماز ادا کرنے کے لیے استعمال کرتے تھے، جسے بعد میں حکام نے ہٹا دیا تھا۔