وویکا نندا ریڈی قتل کے سیاسی محرکات! شرمیلا کا سی بی آئی کے سامنے بیان

حیدرآباد: صدر وائی ایس آر تلنگانہ پارٹی وائی ایس شرمیلا نے کہا کہ ان کا خیال ہے کہ ان کے چاچا وائی ایس وویکا نندریڈی کے قتل کے پس پردہ سیاسی محرکات شامل ہیں۔ اس مقدمہ کی تحقیقات کررہی سی بی آئی نے وائی ایس شرمیلا کو اہ نمبر 259 کے طور پر گواہوں کی فہرست میں شامل کیا گیا۔

 سی بی آئی کے سامنے دئیے گئے بیان میں شرمیلا نے کہا کہ انکا ماننا ہے کہ اس قتل کے پیچھے سیاسی وجوہات ہیں مگر ان کے پاس اپنی بات ثابت کرنے کیلئے کوئی ثبوت نہیں ہے۔ ان کے بیان کے مطابق وویکا نند ریڈی، شرمیلا کی رہائش گاہ پہنچے تھے اور وہ حلقہ لوک سبھا کڑپہ سے وائی ایس اویناش ریڈی کے مقابلہ میں اتر نے کی شدید مخالف تھے۔

 اور انہوں نے شرمیلا سے انتخابات میں حصہ لینے کی خواہش کی تھی۔ شرمیلا نے کہا کہ وہ اس تجویز پر تذبذب میں مبتلا ہوگئی تھیں کیوں کہ وہ جانتی تھی کہ ان کے بھائی جگن موہن ریڈی اس تجویز پر راضی نہیں ہوں گے مگر وویکا نند ریڈی اس بات پر بضد تھے۔

 شرمیلا نے بتایا کہ وویکا نند ریڈی نے اویناش ریڈی کے خلاف انتخابات لڑے تھے۔ اور شائد اس لئے اویناش کے افراد خاندان میں وویکا نند ریڈی کے خلاف ناراضگی رہی ہو۔

 شرمیلا کے بیان کے مطابق وویکا نند ریڈی چاہتے تھے کہ میں جگن موہن ریڈی کو اویناش ریڈی کو کسی بھی قیمت پر ٹکٹ نہ دینے کیلئے راضی کراوں۔ شرمیلا کے بیان کے مطابق قتل کی وجہ قانون ساز کونسل انتخابات بھی ہوسکتے ہیں جس میں وویکا نند ریڈی کو شکست کا منہ دیکھنا پڑا تھا۔