دہلی میں آلودگی کی صورتحال سنگین، اتوار کو اے کیو آئی 460 تک پہنچا

نئی دہلی: قومی دارالحکومت میں فضائی آلودگی پر قابو پانے کے لیے سخت پابندیاں نافذ ہونے کے باوجود اتوار کی صبح آٹھ بجے یہاں ہوا کے معیار اشاریہ (اے کیو آئی) تقریباً 460 درج کیا گیا، جو فضائی آلودگی کی انتہائی خطرناک صورتحال کی نشاندہی کرتا ہے۔

ایئر کوالٹی منیجمنٹ کمیشن (سی اے کیو ایم) نے ہفتہ کو ہوا کو مزید آلودہ ہونے سے روکنے کے لیے گریپ (درجہ بند ردِعملی ایکشن پلان) مرحلہ-4 نافذ کر دیا تھا۔

واضح رہے کہ کمیشن نے ہفتہ کو پہلے گریپ-3 نافذ کیا تھا، لیکن چند ہی گھنٹوں بعد فضائی آلودگی کی سطح بڑھنے پر دہلی شہر اور قومی راجدھانی خطہ (این سی آر) میں گریپ-4 لاگو کر دیا گیا۔ گاڑیوں سے ہونے والی آلودگی اور گرد و غبار (جس کا بڑا حصہ تعمیراتی سرگرمیوں کے باعث ہوتا ہے) کو دہلی میں ہوا کے معیار کی بگڑتی صورتحال کی بنیادی وجوہات مانا جا رہا ہے۔

گریپ-4 کے تحت تعمیر و انہدام کی سرگرمیوں پر پابندی، آلودگی پھیلانے والی گاڑیوں کے داخلے پر روک، بیرونی سرگرمیوں کو کم کرنے کی ہدایات اور اسکولوں کے لیے ہائبرڈ یا آن لائن تعلیم کی سفارشات شامل ہیں۔

واضح رہے کہ 450 سے زیادہ اے کیو آئی کو سنگین زمرے میں رکھا جاتا ہے، جو عام شہریوں بالخصوص بچوں، بزرگوں اور سانس یا دل کی بیماریوں میں مبتلا افراد کے لیے شدید صحتی خطرات پیدا کرتا ہے۔ افسران نے کہا ہے کہ صورتحال پر گہری نظر رکھی جا رہی ہے اور اگر آلودگی کی حالت میں بہتری نہ آئی تو مزید اقدامات پر غور کیا جائے گا۔