پوٹین کا دورہ ہند کا ارادہ

ماسکو۔: روسی صدر ولادیمیر پوٹین رواں سال دسمبر میں ہندوستان کا دورہ کرنے کا ارادہ رکھتے ہیں جہاں وہ وزیر اعظم نریندر مودی سے ملاقات کریں گے۔

خبر رساں ایجنسی اے پی کی رپورٹ کے مطابق روسی صدر کے خارجہ امور کے مشیر یوری یوشاکوف نے صحافیوں کو بتایا کہ پوٹین پیر کو چین میں ہندوستانی وزیر اعظم نریندر مودی کے ساتھ اپنے آئندہ دسمبر کے دورہ پر بات کریں گے۔

واضح رہے کہ پوٹین اور نریندر مودی‘چین میں شنگھائی تعاون تنظیم (ایس سی او) کے سالانہ سربراہی اجلاس کے موقع پر ملاقات کریں گے۔ روسی صدر سربراہی اجلاس میں شرکت کر رہے ہیں اور 31 اگست سے 3 ستمبر تک چین کے 4 روزہ دورہ کے ایک حصہ کے طور پر سائیڈ لائنز پر متعدد دو طرفہ ملاقاتیں کر رہے ہیں۔

وہ چینی ہم منصب شی جنپنگ کے ساتھ بھی اہم ملاقات کریں گے جبکہ دوسری عالمی جنگ کے خاتمہ کی 80ویں سالگرہ کی یاد میں ایک بڑی فوجی پریڈ میں شرکت کریں گے۔ ہندوستانی وزیر اعظم کے ساتھ ملاقات کے علاوہ وہ ترک صدر رجب طیب اردغان اور ایرانی صدر مسعود پیزشکیان کے ساتھ دوطرفہ ملاقاتوں کے علاوہ دیگر رابطے بھی طے کرنے والے ہیں۔

روسی حکام پوٹین اور شمالی کوریا کے رہنما کم جونگ ان کے درمیان بیجنگ میں دو طرفہ ملاقات کے امکان پر بھی کام کررہے ہیں۔ پوٹین کی مودی کے ساتھ اس سال پہلی ملاقات ہوگی لیکن دونوں نے بارہا ٹیلی فون پر رابطہ برقرار رکھا ہے۔