خانہ کعبہ کو غسل دینے کے روح پرور مناظر (ویڈیو)

مکہ مکرمہ: مسجد الحرام مکہ مکرمہ میں غسل کعبہ کی تقریب کا عمل مکمل کر لیا گیا ہے۔چہارشنبہ کو خادم الحرمین الشریفین شاہ سلمان بن عبدالعزیز کی نیابت کرتے ہوئے ڈپٹی گورنر مکہ مکرمہ شہزادہ بدر بن سلطان بن عبدالعزیز نے غسل کعبہ کی تقریب میں شرکت کی۔

اللہ تعالٰیٰ کے گھر کو آبِ زمزم اور خالص عرق گلاب سے دھونے کے بعد عود اور دیگر خوشبوؤں سے معطر کیا گیا۔ غسل کعبہ کی سالانہ تقریب کے آغاز میں خانہ کعبہ کے کلید بردار الشیخ ڈاکٹر صالح آل زین نے بیت اللہ کا دروازہ کھولا۔

خانہ کعبہ کی غسل کی تقریب میں آئمہ کرام اور حرمین شریفین کے انتظامی امور سے متعلق حکام سمیت غیر ملکی سفراء کرام نے بھی شرکت کی۔ پاکستان کے سفیر احمد فاروق نے بھی غسل کعبہ کی رسم میں حصہ لیا۔

واضح رہے کہ غسل کعبہ کی رسم سعودی قائدین مملکت کے قیام کے وقت سے ادا کر رہے ہیں۔ بانی مملکت شاہ عبدالعزیز اپنے عہد میں غسل کعبہ کی رسم ادا کرتے تھے۔ ان کے بعد ان کے حکمراں بیٹے شاہ سلمان بن عبدالعزیز تک اس کی پابندی ہو رہی ہے۔

المسجد الحرام انتظامیہ کے ماتحت خوشبویات کا ادارہ خانہ کعبہ کو معطر کرنے کے لیے اعلٰی درجے کا عود، عرق گلاب اور بخور کا انتظام کرتا ہے۔حرمین شریفین انتظامیہ نے غسل کعبہ کی رسم کی تفصیل بیان کرتے ہوئے کہا کہ غسل کعبہ کی تیاری کے لیے 20 لیٹر آب زمزم چاندی کے دس، دس لیٹر کے دو برتنوں میں رکھا جاتا ہے۔

غسل کعبہ سے قبل خانہ کعبہ کے اندرونی حصے کو اعلٰی درجے کے عود سے دھونی دی جاتی ہے، اس میں تقریباً نصف کلوعود استعمال ہوتا ہے۔غسل کعبہ کا دوسرا مرحلہ سامان کی تیاری سے متعلق ہے۔ غسل کعبہ میں اعلٰی درجے کی کاٹن کا کپڑا استعمال ہوتا ہے۔

اس پر حرمین شریفین پریذیڈنسی کا لوگو لگا ہوتا ہے۔ کاٹن کے کپڑے سے خانہ کعبہ کی دیواروں اور ستونوں کی صفائی بھی کی جاتی ہے اور انہیں صاف بھی کیا جاتا ہے۔