ری ایکٹر دھماکہ،ہر مہلوک مزدور کے خاندان کو ایک کروڑ روپے معاوضہ دینے کمپنی کو تلنگانہ کےوزیراعلی کی ہدایت

حیدرآباد: تلنگانہ کے وزیر اعلیٰ اے ریونت ریڈی نے منگل کے روز اعلان کیا کہ پاشامائلارم میں پیش آئے ری ایکٹر دھماکہ کے سلسلہ میں متعلقہ کمپنی کو ہدایت دی گئی ہے کہ وہ ہر مہلوک مزدور کے ارکان خاندان کو ایک کروڑ روپے معاوضہ ادا کرے۔

مستقل معذوری کا شکار ہونے والے زخمیوں کو دس لاکھ روپے اور دیگر زخمیوں کو پانچ لاکھ روپے معاوضہ دیا جائے گا تاہم وزیر اعلیٰ نے اس بات کا انکشاف نہیں کیا کہ اس معاوضہ کے پیکیج میں ریاستی حکومت کا حصہ کیا ہوگا۔

https://www.youtube.com/watch?v=Oocf7cThK7c

ابتدائی معائنہ کی رپورٹس کی بنیاد پر وزیر اعلیٰ نے تصدیق کی کہ واقعہ میں ہلاک ہونے والوں کی سرکاری تعداد 36 تک پہنچ چکی ہے۔ انہوں نے بتایا کہ دھماکہ کے وقت فیکٹری میں 140 سے زائد ملازمین کام کر رہے تھے، جن میں سے 58 افراد کسی طرح بچ نکلنے میں کامیاب ہوئے۔

غیر سرکاری اطلاعات کے مطابق ہلاکتوں کی تعداد 45 بتائی جا رہی ہے۔

اکثریت مزدوروں کی تعلق بہار، اوڈیشہ، چھتیس گڑھ اور آندھرا پردیش جیسے ریاستوں سے تھی۔

وزیر اعلیٰ نے خبردار کیا کہ اس حادثہ کے لیے جو بھی ذمہ دار پایا جائے گا، اس کے خلاف سخت کارروائی کی جائے گی۔

انہوں نے مزید بتایا کہ چیف سیکریٹری کے رام کرشنا راؤ کی قیادت میں ایک کمیٹی تشکیل دی گئی ہے جو راحت اور بازآبادکاری کے اقدامات کی نگرانی کر رہی ہے۔