فلک نما میں شادی سے 3 دن قبل ہی روڈی شیٹر کا بے رحمانہ قتل

حیدرآباد: شہر کے پُرانے علاقے میں ایک روڈی شیٹر کو نہایت بے دردی سے قتل کر دیا گیا۔ فلک نما سے تعلق رکھنے والے معروف روڈی شیٹر مسیح الدین کو اتوار کی رات رین بازار کے علاقے میں نامعلوم افراد نے سرِ عام چاقوؤں سے وار کر کے ہلاک کر دیا۔

عینی شاہدین کے مطابق حملہ آوروں نے مسیح الدین پر اچانک حملہ کیا اور اُسے بار بار چاقو مارے، جس سے وہ موقع پر ہی دم توڑ گیا۔

پولیس کے مطابق قتل کے پیچھے پرانی دشمنی کا شبہ ظاہر کیا جا رہا ہے اور امکان ہے کہ یہ واردات مسیح الدین کے مخالفین کی جانب سے انجام دی گئی ہو۔ واردات کے بعد لاش کو پوسٹ مارٹم کے لیے عثمانیہ جنرل اسپتال منتقل کر دیا گیا ہے۔

اہم بات یہ ہے کہ مسیح الدین کی شادی کیلئے صرف تین دن باقی تھے، جس سے علاقے میں مزید سنسنی پھیل گئی ہے۔ پولیس نے کیس درج کر کے تفتیش شروع کر دی ہے اور حملہ آوروں کی تلاش جاری ہے۔ علاقے میں سیکیورٹی سخت کر دی گئی ہے تاکہ مزید کوئی ناخوشگوار واقعہ پیش نہ آئے۔