ساتھ نبھانا ساتھیا کی اداکارہ دیولینا بھٹاچارجی نے جم ٹرینر شاہنواز شیخ سے شادی کرلی

ممبئی: ٹی وی اداکارہ دیولینا بھٹاچارجی کی شادی اور شادی سے پہلے کی تقاریب کی کئی تصاویر اور ویڈیوز سوشیل میڈیا پر وائرل ہو رہی ہیں۔

جب تصاویر سامنے آئیں تو دیولینا کے مداح حیران رہ گئے اور پوچھا کہ کیا کسی شو کی تیاری ہے، یا سچ مچ شادی ہورہی ہے۔ قیاس آرائیاں بڑھنے لگیں تو دیولینا کے دوست اور ٹی وی اداکار وشال سنگھ نے حقیقت سے پردہ اٹھایا اور تصدیق کی کہ دیولینا بھٹاچارجی نے ان سے نہیں بلکہ اپنے جم ٹرینر شاہنواز شیخ سے شادی کرلی ہے۔

پہلے وشال سنگھ اور دیولینا کی مہندی اور شادی کے جوڑے میں تصاویر سامنے آئی تھیں جس پر دیولینا کے مداح کنفیوز ہوگئے تھے۔

وشال سنگھ کی جانب سے شادی کی تصدیق کے بعد دیوولینا نے خود بھی اپنے انسٹاگرام اکاؤنٹ پر اپنے شوہر شاہنواز شیخ کے ساتھ تصویریں شیئر کیں اور کہا کہ چراغ لے کر ڈھونڈتی تب بھی ایسا شخص اسے نہیں ملتا۔

اداکارہ نے اپنے جم ٹرینر شاہنواز شیخ کے ساتھ شادی سے پہلے ایک طویل عرصے تک ڈیٹنگ کی اور اب دونوں شادی شدہ ہیں۔

دیولینا کے گھر کے قریب ہی ایک جم تھا جہاں شاہنواز ٹرینز تھا۔ دونوں کی ملاقات جم میں ہوئی۔ شاہنواز نے دیولینا کی فزیو تھراپی میں کافی مدد کی تھی جبکہ وہ اپنے ٹی وی شو ساتھ نبھانا ساتھیا کے سیٹ پر حادثے کا شکار ہوکر زخمی ہوگئی تھی۔

دونوں کے درمیان قربت بڑھ گئی لیکن ان کے خاندان شروع میں اس شادی پر اعتراض کررہے تھے۔ بعد میں معاملات طے پاگئے اور اب بالآخر ان کی شادی ہوگئی۔

بتایا جاتا ہے کہ جب دیولینا حادثہ کے بعد کافی مشکل وقت سے گذر رہی تھی تو شاہنواز اس کا بہت مضبوط سہارا ثابت ہوا اور یہی بات دیولینا کو کافی متاثر کرگئی۔ بگ باس کے سفر کے دوران بھی شاہنواز نے دیولینا کو بہت سپورٹ کیا تھا۔

دیولینا بھٹاچارجی اس وقت گھر گھر مشہور ہوگئی تھی جب انہوں نے ساتھ نبھانا ساتھیا میں جیا مانک کی جگہ گوپی بہو کا کردار ادا کیا تھا۔ بعد میں وہ لال عشق جیسے شوز اور ساتھ نبھانا ساتھیا کے دوسرے سیزن میں بھی نظر آئیں۔