سعودی عرب نے سویڈن کی سفیر کو طلب کرلیا
سعودی وزارت خارجہ نے گزشتہ ہفتے کہا تھا کہ قرآن جلانے کے واقعہ سے باہمی احترام متاثر ہوا ہے، جو ممالک اور عوام کے درمیان تعلقات استوار کرنے اور انتہا پسندی سے نمٹنے کے لیے ضروری ہے۔
ریاض: سعودی وزارت خارجہ نے پیر کو کہا کہ اس نے اسٹاک ہوم میں ایک مسجد کے سامنے قرآن مجید کو نذر آتش کرنے کے حالیہ واقعہ پر ریاض میں سویڈن کی سفیر کو طلب کیا ہے۔
ٹویٹر پر پوسٹ کردہ ایک بیان میں، وزارت نے کہا، "وزارت خارجہ نے ملک میں سویڈن کی سفیر کو طلب کیا اور انہیں عیدالاضحیٰ کے بعد سویڈن میں اسٹاک ہوم کی مرکزی مسجد کے سامنے ایک انتہا پسند کی طرف سے قرآن پاک کو نذر آتش کرنے پر ملک کی واضح ناپسندیدگی سے آگاہ کیا۔
سعودی وزارت خارجہ نے گزشتہ ہفتے کہا تھا کہ قرآن جلانے کے واقعہ سے باہمی احترام متاثر ہوا ہے، جو ممالک اور عوام کے درمیان تعلقات استوار کرنے اور انتہا پسندی سے نمٹنے کے لیے ضروری ہے۔
عیدالاضحیٰ کی تعطیل کے پہلے دن 28 جون کو اسٹاک ہوم کی مرکزی مسجد کے باہر ایک احتجاج ہوا، جس کے دوران قرآن مجید کو نذر آتش کیا گیا۔ سویڈش پولیس نے مظاہرے کی اجازت دی۔ سویڈن کے وزیر اعظم الف کرسٹرسن نے کہا کہ یہ اجازت ‘جائز لیکن غیرمناسب’ تھی۔
اسٹاک ہوم میں قرآن کی بے حرمتی اور جلانے کے واقعے کی دنیا بھر میں مذمت کی گئی۔ عراق نے سویڈش حکام سے اس واقعے کے ذمہ دار تارکین وطن کو حوالے کرنے کا کہا ہے۔ عرب لیگ کے سیکرٹری جنرل اور خلیج تعاون کونسل کے سربراہ سمیت کئی سربراہان مملکت نے اس فعل کی مذمت کی ہے۔
